काठमाडौं- सत्तारुढ गठबन्धनले मंगलबारसम्ममा न्यूनतम साझा कार्यक्रम ल्याइसक्ने गरी तयारी गरिरहेको छ ।
स्रोतका अनुसार साझा कार्यक्रमपछि मात्र मन्त्रिमण्डल विस्तार गर्ने तयारी छ । सोमबार प्रधानमन्त्री निवास बालुवाटारमा भएको गठबन्धन दलका शीर्ष नेताहरूको बैठकले ‘पहिले साझा कार्यक्रम त्यसपछि मन्त्रिमण्डल विस्तार’को रणनीतिमा सहमति जुटाएको हो ।
कांग्रेस सभापति तथा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र जसपा अध्यक्ष उपेन्द्र यादवलगायत नेताबीच सोमबार बालुवाटारमा छलफल भएको थियो ।
सत्तारुढ दलद्वारा गठित कार्यदलले मंगलबारसम्म सरकारका न्यूनतम साझा कार्यक्रम शीर्ष नेतालाई बुझाउने तयारी गरेको छ । कार्यदलमा कांग्रेसबाट पूर्णबहादुर खड्का र रमेश लेखक, माओवादी केन्द्रबाट देवप्रसाद गुरुङ र वर्षमान पुन, जसपाबाट राजेन्द्र श्रेष्ठ र महेन्द्रप्रसाद यादव सदस्य छन् ।
सरकारलाई विश्वासको मत दिएका एमाले वरिष्ठ नेता माधवकुमार नेपाल समूहले तत्काल सरकारमा जान अनिच्छा देखाइरहेको सन्दर्भमा उक्त समूहलाई पर्खेर बस्ने मनस्थितिमा सत्ता गठबन्धन देखिएको छैन । पार्टी केन्द्रीय कमिटीमा ४५ प्रतिशतभन्दा बलियो उपस्थिति रहेको नेपाल समूह संसदीय दलमा झण्डै ३३ प्रतिशतको हिस्सेदार मात्र छ । सोही कारण सरकारमा सहभागी हुन र नयाँ पार्टी खडा गर्न उकत समूह तयार नभएको हो ।