काठमाडौं- कांग्रेस नेता गगन थापाले प्रधानमन्त्री शेरबहादुर देउवालाई विदेशमा गरेको उपचार खर्च राज्यले व्यहोर्ने विषय गैरकानूनी भएको भन्दै सचेत गराएका छन्।
मंगलबार माओवादी केन्द्रका अध्यक्ष पुष्पकमल दाहालको निवासबाट दिल्लीमा उपचाररत एमाले वरिष्ठ नेता झलनाथ खनाललाई फोन गरी उपचार खर्च राज्यले बेहोर्ने प्रतिबद्धता जनाएको समचार आएपछि थापाले देउवालाई सचेत गराएका हुन्।
बुधबार विज्ञप्ति जारी गर्दै थापाले भनेका छन्, ‘सम्माननीय प्रधानमन्त्रीज्यू, कुनै पनि व्यक्तिले विदेशमा गरेको उपचार खर्च राज्यले बेहोर्ने विषय गैरकानूनी हो र अघिल्लो सरकारले कानूनविपरीत गरेको निर्णयको भारी यो सरकारले बोक्ने छैन भन्ने कुरामा तपाईं सचेत हुनुहुन्छ र तपाईंको भनाई उधृत गर्दै आएका समाचार गलत हुन भन्ने विश्वास छ।’
थापाले विदेशमा उपचार गराएको खर्च राज्यले व्यहोर्न नमिल्ने कानून ०७४ सालमै बनेको बताएका छन्।
थापाले पूर्वप्रधानमन्त्री खनालको उपचारको सन्दर्भमा सबैले शीघ्र स्वास्थ्य लाभको कामना गरिरहेको उल्लेख गरेका छन्। नेपालको लोकतान्त्रिक आन्दोलनमा अभूतपूर्व योगदान पुर्याएका खनालले पछिल्लोपटक निजी नाफा घाटाको हिसाब नगरी संविधान र लोकतन्त्रको पक्षमा आफूलाई उभ्याएको बताउँदै थापाले त्यसले उनको कद अझ बढेको बताएका छन्।
खनालसमेतको अडान र नेतृत्वदायी भूमिकाका कारणले जोगिएको संसदमा सँगै काम गर्न प्रतीक्षारत रहेको बताउँदै थापाले चाहना छिटै पूरा हुने विश्वास व्यक्त गरेका छन्। ‘उहाँको उपचारको लागि परिवार, स्वजन, पार्टी पङ्क्ति लागिरहेकै छ। उहाँलाई उपचार खर्च जुटाउनुपर्ने अवस्था नै आएमा त्यसको लागि देशविदेशमा रहेका हामी सबै नेपाली हरदम तयार छौँ र रहन्छौँ नै,’ थापाले भनेका छन्, ‘यस्तो बेलामा उहाँको विदेशमा गरेको उपचारको खर्च सरकारले बेहोर्ने भन्ने विषय उठाई उहाँको बारेमा अनावश्यक टीकाटिप्पणी गर्ने वातावरण बनाएर उहाँ र उहाँको परिवारलाई दुःखी नबनाऊँ।’