थाहा छैन ? क्रान्तिले बनेको सरकार हो
बोल्न पाइँदैन

कहिले बालकोट
कहिले बूढानीलकण्ठ विचरण गरी
बनाइएको सरकार हो
बोल्न पाइँदैन

मनलाग्दी सरकारी ढुकुटी बाँड्छु
बोल्न पाइँदैन

ऐन कानून बर्खिलाफ जान्छु
बोल्न पाइँदैन

राजनीतिको सिन्डिकेट खडा गर्छु
बोल्न पाइँदैन

मेरा कारिन्दाले धम्क्याउने छन्
बोल्न पाइँदैन

म राजसी शैली झल्काउँछु
बोल्न पाइँदैन

परिवारलाई सत्ताको मह चटाउँछु
बोल्न पाइँदैन

कर्तव्य बोध होइन
अधिकार खोस्न सिकाउँछु
बोल्न पाइँदैन

अध्यादेश, ऐन मेरा स्वार्थमा
खडा गर्नेछु
बोल्न पाइँदैन

मेरो विरोध गरेको मन पर्दैन
विरोध गरे
मुख थुन्ने छु
मुखमा आगो झोस्नेछु
च्याप्प समाती गाडीमा फाल्ने छु

मुख नथुन्नेको जागिर सलामत
नरहने उर्दी जारी गरेको छु

बोल्न पाइँदैन
यो हामीले ल्याएको
गणतान्त्रिक सरकार हो
केही गरे पनि बोल्न पाइँदैन