काठमाडौं- करिब दुई महिनापछिको पहिलो उडानमा यात्रुको उत्साहजनक निकै सहभागिता रहेको बुद्ध एयरको अनुभव छ। बिहीबार विज्ञप्तिमार्फत निजी क्षेत्रको अग्रणी वायु सेवा प्रदायक कम्पनी बुद्ध एयरले आफ्ना अनुभव बाँडेको हो।
कोरोना प्रसार रोक्न लागू गरिएको निषेधाज्ञाका कारण ५८ दिनदेखि बन्द हवाई उडान बिहीबारदेखि शुरु भएको हो। सरकारको निर्देशनअनुसार निषेधाज्ञाअघि हुने उडान संख्याका आधारमा अहिलेलाई ५० प्रतिशतमा झारिएको छ। त्यसमा बुद्ध एयरले दैनिक ३१ उडान पाएको छ।
३१ वटा उडानबाट झन्डै ३८ सय यात्रुले आवतजावत गर्न सक्ने विज्ञप्तिमा उल्लेख छ। बुद्ध एयरका सेल्स एन्ड मार्केटिङ निर्देशक रुपेश जोशीका अनुसार पहिलो दिन सो एयरलाइन्समा ३५ सय बुकिङ भएको थियो।
‘यो हाम्रा लागि निकै उत्साहजनक संख्या हो,’ विज्ञप्तिमा उल्लेख छ, ‘गत वर्ष पहिलो लकडाउनपछिको उडानमा यात्रुको यस्तो सहभागिता थिएन।’
नागरिक उड्डयन प्राधिकरणको उडान तालिकाअनुसार हरेक घण्टामा सात उडान मात्रै हुनाले विमानस्थलमा भीडभाड छैन।
कोभिड रोकथामका लागि जारी निर्देशिकाअनुसार उडान सेवा सञ्चालन भइरहेको छ। हरेक यात्रुको तापक्रम मापन, सेनिटाइजरको व्यवस्था, जहाजभित्र मास्क र फेससिल्डको अनिवार्य प्रयोगलगायत सुरक्षा मापदण्ड अपनाएको बुद्ध एयरले जनाएको छ।
बढीपहिरोले बाटोघाटो असहज भएका गन्तव्यमा बुद्ध एयरले उडान थप गरेको पनि विज्ञप्तिमा जनाइएको छ। बुद्ध एयरसँग १५ मध्ये १० एटीआर-७२, तीन एटीआर-४२ र दुईवटा बिचक्राफ्ट जहाज छन्।