पढेलेखेका युवाले
योजनासहित देश हाँकेको

विश्व मानचित्रमा विकासमा
द्रुत गतिमा दगुरिराखेको नेपाल
औद्योगिक विकासले रफ्तार समातेको

नेपाली ऐलाले
विश्व बजारमा धुम मचाएको

नेपाली मःमका स्टल
विश्वका कुनाकाप्चामा खुलेको

नेपाली वैज्ञानिकलाई लिन
तँछाडमछाड भइराखेको

नेपालले विकास गरेको
नयाँ प्रविधिमा
विश्व बजारले आँखा लगाएको

डाँडाकाँडामा रेल दौडिराखेको
विश्व पर्यटनमा नेपाल नमूना भएको

नेपाली मुद्राको सबैतिर माग भएको
नेपाली स्टकमा विश्वको लगानी ओइरिएको

अर्थतन्त्र कसरी चलाउने
हाम्रा अर्थमन्त्री विश्व मञ्चमा
भाषण गर्दै गरेको

नेपाली कूटनीतिको जताततै तारिफ
नेपाली विद्युतीय प्रविधिको
हार्वर्डमा पढाइ

नेपाली विकासको सिद्धान्तले
विश्वका सबै सिद्धान्तलाई खारेज गरेको

नेपाली नदी नालामा
जल आहार-विहारको मज्जा

झल्याँस्स निन्द्रा खुलेको त

नेपाल श्रीलंका हुँदैछ भन्ने समाचार
अधिकारका लागि मण्डलामा
जिन्दावाद मुर्दावादको नारा

बस दुर्घटनामा मृत्युको समाचार
कर्णाली प्रदेशमा भोकमरीको समाचार

भ्रष्टाचार, बेथितिको समाचार
स्वार्थी राजनीतिको समाचार

विकासभन्दा गफका भारी नेता
राजनीतिका लागि
राजनीति गर्न व्यस्त नेता

राष्ट्रियताका नाममा
छिमेकीलाई गाली गर्दै हाम्रा नेता

विमानस्थलमा देश छाड्ने लर्को
सिमानामा दैनिकी टार्न भारत जाने लाम

जातीयता क्षेत्रीयताका नाममा
देश भाँड्दै गरेका नेता

डुंगडुंग्ती गनाएका
काठमाडौंका नदीनाला

हाम्रो कल्याण गर्नु है
हे अनाथहरूका नाथ पशुपतिनाथ