सुनसरी- ‘दुर्घटनामा परेर थला परेपछि आर्थिक सहयोगका लागि याचना’ शीर्षकको समाचार ८ माघमा नेपाली हेडलाइनमा प्रकाशित भएपछि बिरामीलाई धमाधम सहयोग जुटिरहेको छ।
प्रदेश-१ सांसद ममता तामाङ तथा बराहक्षेत्रका चर्चित युवा पण्डित योगेश भण्डारीलगायत देश–विदेशमा रहेका बराहक्षेत्रवासीको उक्त समाचारले ध्यानाकर्षण भएको थियो।
समाचार पढेपछि बयरवन सामुदायिक वन उपभोक्ता समितिका पदाधिकारीहरू बिरामी पदम मगरको घरमा पुगी स्वास्थ्य अवस्था बुझ्दै ५ हजार रुपैयाँ सहयोग उपलब्ध गराएका छन्।
सफारी दुर्घटनामा परी ओछ्यान थला परेपछि बराहक्षेत्र नगरपालिका–२ बयरवन बजारका पदमले उपचार गर्न आर्थिक सहयोगको लागि याचना गरेका थिए।
समाचार पढेपछि बराहक्षेत्र–१ चतरा निवासी हाल यूएईको अबुधावी बस्ने सामाजिक अभियन्ता दिलिपकुमार रायले ५ हजार रुपैयाँ सहयोग गरेका छन्।
यी हुन् मनकारी दाताहरू
बराहक्षेत्र-२ घर भई हाल हङकङ बस्ने मज्जाको राई रु. ५०००
बयरवन सामुदायिक वन उपभोक्ता समिति रु. ५०००
बराहक्षेत्रका चर्चित युवा पण्डित योगेश भण्डारी रु. १०००
वडा १ लालबस्तीका समाजसेवी रञ्जित लोहनी रू १०००
ईश्वर खड्का रु. १०००
भजन गायक तथा धार्मिक कलाकार बद्री दाहाल रु. १०००
देवी श्रेष्ठ रु. ६००, जागृति चोक
आकाश राई रु. ५०५, हाटखोला
प्रेम खड्का रु. ५००, सूर्य चोक
उनीहरूले पत्रकार हिमाल राईले समाचार प्रकाशित गरेपछि उनीमार्फत सहयोग उपलब्ध गराएका हुन्। पत्रकार राईले बिमारी पदमको घरमा पुगी सो रकम उपलब्ध गराएका छन्।
बयरवन सामुदायिक वन उपभोक्ता समिति सदस्य पुष्प पौडेलले समूहका साधारण सदस्य पदम सफारी दुर्घटनामा परी घाइते भएको र घरको आर्थिक अवस्था दयनीय भएको समाचार पढेपछि पत्रकार राईको रोहवरमा रकम उपलब्ध गराएका थिए।
आर्थिक सहयोग पाएसँगै उनको उपचार गर्न राहात मिलेको पदमकी श्रीमती देवकुमारी मगरले बताइन्।
गत १ माघमा सप्तकोशी नदी किनारमा मलामी जाने क्रममा सफारी दुर्घटना भई उनी घाइते भएका थिए। उनको कम्मरमुनिको देब्रेपट्टीको हड्डी चर्किएको छ।
घरको आर्थिक अवस्था कमजोर र दयनीय भएका कारण उनले उपचार र पौष्टिक खानेकुरा किनेर खान सकिरहेका थिएनन्।
बिरामी पदमको १०० वर्षीया वृद्धा आमा पनि ओछ्यान परेकी छन्।