काठमाडौं – कतारमा जारी विश्वकपका स्पेनिस रेफ्री माटेउ लाहोज घर फर्किएका छन् । जारी विश्वकप अन्तर्गत नेदरल्यान्ड्स र अर्जेन्टिनाबीच क्वाटरफाइनल खेलमा विवादित बनेका रेफ्री लाहोज घर फर्किएका हुन्।
नेदरल्यान्ड्स र अर्जेन्टिनाबीच क्वाटरफाइनल खेलमा मुख्य रेफ्रीको जिम्मेवारी निर्वाह गरेका लाहोजको आलोचना भएको थियो।
फिफाले विश्वकपको बाँकी खेलमा उनलाई कुनै खेलको जिम्मेवारी नदिने भएसँगै लाहोज स्पेन फर्किएका हुन् । क्वाटरफाइनलमा उनले पहेँलो कार्डको वर्षा गरेका थिए । यस खेलमा विश्वकपको इतिहासमै अहिलेसम्मको सबैभन्दा धेरै पहेँलो कार्ड दिइएको थियो ।
यसअघि २००६ मा पोर्चुगल र नेदरल्यान्ड्सबीचको खेलमा १६ पहेँलो कार्ड दिइएको थियो ।
उनले खेल अवधिभर १८ पहेँलो कार्ड देखाएका थिए । नेदरल्यान्ड्स र अर्जेन्टिना दुवै टोलीका खेलाडी र प्रशिक्षकले उनको आलोचना गरेका थिए।
अर्जेन्टिनी कप्तान मेस्सीले नेदरल्यान्ड्सविरुद्धको विश्वकपको क्वाटरफाइनल खेलमा रेफ्रीले राम्रो भूमिका नखेलेको आरोप लगाएका थिए। रेफ्रि लाहोजले विश्वकप जस्तो प्रतियोगिताको क्वाटरफाइनलमा आफ्नो भूमिका राम्रोसँग निभाउन नसकेको भन्दै मेस्सी आक्रोशित भएका थिए।
खेलपछि कुरा गर्दै मेसीले भने– ’ म रेफ्रीको बारेमा कुरा गर्न चाहन्न । किनकि उनीहरू इमानदार थिएनन् । फिफाले यस बारेमा हेर्नु पर्छ । फिफाले आफ्नो भूमिका निभाउन नसक्नेलाई यति ठुलो खेलमा राख्नु हुँदैन ।’
उक्त खेलका लागि फिफाले इटालियन रेफ्रीको टोली नियुक्त गरिसकेको छ । इटालीका ड्यानीएल ओर्साटो खेलको मुख्य रेफ्री रहनेछन् ।