काठमाडौँ । कतारमा जारी फिफा विश्वकप २०२२ अन्तर्गत आज समूहमा दोस्रो चरणका अन्तिम खेल हुँदै छन् ।
समूह ‘जी’मा ब्राजिल र स्विट्जरल्याण्ड तथा क्यामरुन र सर्वियाबीच भिडन्त हुने भएको छ ।
क्यामरुन र सर्विया दिउँस ३ः४५ बजे भिड्दा ब्राजिल र स्विट्जरल्याण्डको खेल ९ः४५ बजे हुनेछ । समूहमा ब्राजिल र स्विट्जरल्याण्डले पहिलो खेलमा जित निकालेका थिए ।
दुवै टिम आजको खेलमा जित निकालेर अन्तिम १६ मा पुग्ने योजनामा छन् । पहिलो खेलमा पराजित भएका सर्विया र क्यामरुनका लागि भने अन्तिम १६ मा पुग्न आजको खेल महत्वपूर्ण छ ।
यस्तै समूह ‘एच’ मा आज दक्षिण कोरिया र घाना ६ः४५ बजे भिड्दा पोर्चुगल र उरुग्वेबीचको खेल मध्यराति १२ः४५ बजे हुनेछ।
पोर्चुगलले पहिलो खेलमा घानालाई हराएको थियो । दक्षिण कोरिया र उरुग्वेले बराबरी खेल्दै अंक बाँडेका थिए । आजको जितले पोर्चुगल अन्तिम १६ मा पुग्छ । बाँकी टिमलाई अन्तिम १६ मा पुग्न आजको खेल महत्वपूर्ण छ।
