काठमाडौँ । दार्चुलामा एचआईभी संक्रमितको संख्या बढ्दै गएको छ । गत आर्थिक वर्षसम्म जिल्ला अस्पतालबाट ४२ जना संक्रमितले एआरटी सेवा लिइरहेका छन् । गत वर्ष तीन जना एचआईभी संक्रमित थपिएका छन् ।

अहिले जिल्ला अस्पतालबाट सेवा लिनेमध्ये २० पुरुष, २० महिला तथा दुई जना बालबालिका छन् । जिल्ला अस्पताल दार्चुलाका एआरटी काउन्सिलर लोकेन्द्र सिंह धामीले दिएको जानकारीअनुसार ४२ मध्ये एक जनाको एचआईभी एड्सकै कारण गत आर्थिक वर्षमा मृत्यु भयो । आर्थिक वर्ष २०७०-७१ वटा जिल्लामा एआरटी सुरु भएयता एचआईभी एड्सका कारण ६ जनाको ज्यान गएको छ ।

लेकम गाउँपालिका १ सर्मौलीका ती युवक अन्तिम अवस्थामा अस्पताल पुगेकाले बचाउन नसकिएको उनले बताए । धनगढीको सेती अस्पतालमा दुईपटक उपचारमा गए तर बच्न सकेनन् । भारतमा मजदुरी गरेर फर्किएका ती युवकमा एचआईभी संक्रमण अन्तिम अवस्थामा पुगेको थियो ।

उनका अनुसार जिल्लाको महाकाली नगरपालिकामा पाँच महिला तीन पुरुष गरी आठ जना, शैल्य शिखर नगरपालिकामा पाँच महिला चार पुरुष गरी नौ जना एचआईभी संक्रमित छन् । मालिकार्जुन गाउँपालिकामा ६ महिला, चार पुरुष, लेक गाउँपालिकामा चार महिला, चार पुरुष र एक नाबालक, मार्मा गाउँपालिकामा तीन पुरुष र एक नाबालक तथा दुहुँ गाउँपालिकामा दुई जना पुरुषमा एचआइभी संक्रमित रहेको धामीले जानकारी दिए ।

जिल्लाको अपी हिमाल गाउँपालिका, नौगाड गाउँपालिका तथा व्यास गाउँपालिकामा एचआइभी संक्रमित फेला परेका छैनन् । दार्चुलामा संक्रमितको संख्या बढ्नुको मुख्य कारण असुरक्षित यौन सम्पर्क हो । भारतसँग सिमाना जोडिएकाले पनि दार्चुलामा एचआईभीको जोखिम झन् बढेको हो ।

यहाँका अधिकांश नागरिक भारतमा मजदुरी गर्न जान्छन् । लामो समयसम्म भारतमा मजदुरी गर्दा असुरक्षित यौन सम्पर्क गरेर फर्किंदा घर परिवारमा समेत एचआइभी संक्रमण फैलाउने गरेका छन् । संक्रमितलाई हेर्ने समाजको दृष्टिकोण परिवर्नत नहुँदा पनि महिला पुरुष समयमै उपचारका लागि खुल्न नसक्दा जोखिम बढ्दै गएको छ ।