भारतमा राष्ट्रपति रामनाथ कोविन्द र प्रधानमन्त्री नरेन्द्र मोदीले अनौठो राजनीतिक संस्कार देखाएका छन्। आफ्नो पुर्ख्यौली थलो पुगेका प्रधानमन्त्री मोदीलाई स्वागत गर्न राष्ट्रपति कोविन्द नयाँदिल्लीबाट हेलिकोप्टर चढेर आफैं उपस्थित भए।
उत्तरप्रदेशको कानपुरनजिकको देहातको गाउँ कोविन्दको पुर्ख्यौली थलो हो। प्रधानमन्त्री मोदी आफू जन्मे–हुर्केको गाउँ पुग्ने जानकारी पाएका उनी प्रोटोकल तोड्दै उनलाई स्वागत गर्न गएका हुन्।
उक्त गाउँमा आयोजित समारोहलाई सम्बोधन गर्दै मोदीले राष्ट्रपतिको उक्त संस्कारले आफूलाई हैरान बनाएको र लज्जा अनुभूति भएको बताए। ‘एकातिर मुलुकको संविधान नै यहाँ उपस्थित छ, अर्कोतिर उच्च संस्कार,’ मोदीले भने, ‘राष्ट्रपतिले आफ्नो पदका कारण बाँधेका सबै मर्यादा तोडेर आफैं उपस्थित हुनुभएको छ। हेलिप्याडमा उहाँ आफैं मलाई स्वागत गर्न आउनु हुँदा लज्जाबोध भएको छ। उहाँकै मार्गदर्शनमा हामी काम गरिरहेका छौँ। र, उहाँको पदको विशिष्ट गरिमा छ।’
मोदीको भनाइको जवाफ दिँदै राष्ट्रपति कोविन्दले भने, ‘संविधानका मर्यादाहरूको पालना त म सधैं गर्छु। तर, आज आफ्नो गाउँमा अतिथिको सत्कारका लागि आएको हुँ। म राष्ट्रपतिको हैसियतले होइन, यस गाउँको एक बच्चाको रूपमा आएको हुँ। यस गाउँको एक नागरिकको रूपमा मोदीजीलाई स्वागत गर्छु।’