आफ्ना गाउँका पहिला
निजामति अधिकृत धनिराम
बडका भलमन्सालाई भेट्न आइपुगे

अनुहार हेर्दा लाग्थ्यो,
जागिर होइन
भूकम्पको केन्द्रबाट फर्केका हुन्

बडका भलमन्साले सोधे-
के भो नाति, किन यति ओइलाएको ?

धनिरामले लामो सास फेरे-
अरे बाजे, माहोल गज्जब छ
हाम्रो मन्त्रालयमा जो आए पनि
हामीलाई तर्साउँछन् !

मन्त्रीले बोलाएर भन्छन्-
हामीले जे भन्यौं, त्यही गर्नुपर्छ

नियम कानूनको कुरा गरे,
धेरै विद्वान् नबन भनेर हकार्छन्

मिल्दैन भन्‍न पाइँदैन,
कानून देखाउन पाइँदैन
कहिले मन्त्री रिसाउँछन्
कहिले कार्यकर्ता कराउँछन् !

अब त लाग्‍न थाल्यो बाजे
जागिर छाडेर गाउँमै फर्कूं
दुईवटा भैंसी पालूँ,
मकै र धान रोपौं !

आफ्नो इज्जत पनि जोगिन्छ,
राति निद्रा त पर्छ कमसेकम !