मन्त्रालयभित्रै
सुतेको र खाएको देखेर
बडका भलमन्साको मनमा
नयाँ योजना पलायो

हतारिँदै भतिज ठग्गालाई बोलाए
र भने-

ए भतिज
अर्कोपटक नेपाल जाँदा
होटलमा किन बस्‍ने ?
सीधै लौटनकै मन्त्रालयमा
डेरा जमाउने !

जाँड, सिद्रा, दाल, चामल,
दाउरासमेत बोकेर जाऔंला
ग्यासको समस्या छ रे !

लौटनको अफिस कोठाको
छेउमै भान्सा बनाऔंला

सिंहदरबारको चौरमा बसेर
मिठोसँग खाना खाऔंला

काका,
हातमुख धुन नुहाउन के गर्ने ?
ठग्गाले जिज्ञासा राख्यो

बडका भलमन्सा मुस्कुराए
चौर छँदैछ
त्यहीं धारो खोजेर नुहाऔंला

अनि लुगा कहाँ सुकाउने नि काका ?
ठग्गाले फेरि सोध्यो

त्यो पनि के गाह्रो भयो र भतिज
मन्त्रालय अगाडिको पर्खाल छँदैछ
त्यहीं अंगोछा र कमिज टाँगौंला
सरकारी हावा खाएर चाँडै सुक्लान् !

यति सुन्‍नासाथ
ठग्गाको मुहार उजालो भो

हुन्छ काका
यसपालि होटल खर्च जोगियो
भन्दै ऊ खुशी-खुशी
झोला, हुक्का, भाँडाकुँडा
मिलाउन लाग्यो !