प्रधानमन्त्रीले नेपालले
भारतीय जमिन मिचेको छ भनेपछि
बडका भलमन्सा बडा परेशान भए !
रातभरि ओछ्यानमा कोल्टे फेरिरहे
निन्द्रा त परै जाओस्
आफ्नै घरको भित्तामा पनि
शंका लाग्न थाल्यो
बिहानै भतिज ठग्गालाई बोलाए
ए भतिज,
के गर्ने होला अब ?
हिजोसम्म यहींको
राष्ट्रीय गान गाएका हामी
भोलिदेखि उताको गाउनुपर्ने हो कि ?
ठग्गा मुसुक्क हाँस्यो
काका, किन आत्तिनु हुन्छ
लुगा उस्तै, भाषा उस्तै,
नेता पनि उस्तै,
झुट पनि उस्तै !
खेतीपातीमा उताको सरकारले
सुविधा पनि दिन्छ रे
झुम्का छाप खैनी ल्याउँदा
भन्सार पनि लाग्दैन !
बडका भलमन्साको अनुहार रातो भयो
“ए मुला ठग्गा
तँलाई देश चाहिएको हो कि खैनी ?”
ठग्गाले फेरि भन्यो,
“काका,
देश त नेताको भाषणले चल्ने रहेछ
आज यता भोलि उता !”
बडका भलमन्साले लामो सास फेरे
हामी त यतै जन्मियौं
यतै हुर्कियौं,
यतै मर्छौं पनि
तर, अब डर लाग्न थाल्यो
कतै भोलि नेताले
आफू पनि उताकै हो भनिदिए,
उतैको रंगमा रंगिए !
ठग्गाले भन्यो,
काकाको कुरामा बडा दम छ !
बडका भलमन्साले
टाउको हल्लाउँदै भने-
देशको सीमा मिचिएको
छ कि छैन थाहा छैन,
तर नेताहरूले
जनताको दिमागचाहीं
धेरै अघि नै मिचिसकेछन् !