काठमाडौं- आज २१ मे। विश्व इतिहासका अनेकन घटनाले आजको दिन स्मरण गराउँछन्। प्रस्तुत छ, विश्व चर्चित केही घटनाको सारसंक्षेप।
– सन् १९०४- फिफाको स्थापना
विश्व फुटबलको नियामक निकाय ‘फुटबल इन्टरनेसनल डे फुटबल एसोसिएसन (फिफा)’ आजकै दिन स्थापना भएको हो। विश्वकप फुटबलको आयोजना फिफाले नै गर्दै आएको छ। विश्वकप फुटबल विश्वको सर्वाधिक हेरिने खेलकुद प्रतियोगिता हो।
– सन् १९३२- एटलान्टिक सागर पार गर्ने पहिलो महिला
सन् १९३२ मा आजकै दिन अमेरिकाकी एमेलिया इयरहार्टले एकल नन-स्टप उडानमार्फत एटलान्टिक महासागर पार गरेर रेकर्ड राखेकी थिइन्। उनी सोलो उडानबाट एटलान्टिक सागर पार गर्ने पहिलो महिला हुन्। त्यसको ५ वर्षपछि संसारको परिक्रमा गर्न जहाजमा निस्केकी उनी बेपत्ता भएकी थिइन्। उनी बेपत्ता भएको घटना संसारमा नसुल्झिएको रहस्यहरू मध्ये एक हो।
– सन् १९९१- राजीव गान्धीको हत्या
भारतका पूर्व प्रधानमन्त्री राजीव गान्धीको आजकै दिन आत्मघाति विष्फोट गराएर हत्या गरिएको थियो। श्रीलंकाको पृथकतावादी समूह लिट्टे समर्थक एक महिलाले आत्मघाति बम विष्फोट गराएर उनको हत्या गरेकी थिइन्। घटनामा गान्धीसहित १४ जना मारिएका थिए।
– सन् २००३- अल्जेरिया भूकम्पमा गयो २ हजारको ज्यान
सन् २००३ मा आजकै दिन अफ्रिकी मुलुक अल्जेरियामा शक्तिशाली भूकम्प गएको थियो। त्यसमा परी २ हजारभन्दा बढीको ज्यान गएको थियो। ६.८ रेक्टरस्केलको भूकम्पबाट राजधानी अल्जियर्स र बौमर्डिस प्रान्तमा बढी क्षति पुगेको थियो।
– सन् २०१४- थाइल्यान्डमा मार्सल ल
सन् २०१४ मा थाइल्यान्डमा त्यहाँको सेनाले मार्सल ल लागू गरेको थियो। र, त्यसक्रममा थुप्रै सञ्चार माध्यमहरू बन्द गराइएको थियो।
– सन् २०२१- गड पार्टिकलपछि भेटियो शक्तिशाली ब्रह्माण्डीय किरण
सन् २०२१ मा जापानका वैज्ञानिकहरूले शक्तिशाली ब्रह्माण्डीय किरण भेटिएको घोषणा गरेका थिए। ब्रह्माण्डमा भगवानको उपस्थिति रहेको प्रमाण दिने उक्त किरण फेला पर्नुअघि वैज्ञानिकहरू धर्तिमा गड पार्टिकल ‘ओह माई गड’ पत्ता लगाएका थिए। ब्रह्माण्डीय किरणको पछिल्लो खोजी ओसाका विश्वविद्यालयका वैज्ञानिकहरूले ‘२४० एक्जा-इलेक्ट्रोनभोल्ट’ टेलिकोस्पमार्फत गरेका हुन्। उक्त किरणलाई वैज्ञानिकहरूले ‘अमातेरासु’ नाम दिएका छन्।
– सन् २०२४- टर्बुलेन्समा फस्यो विमान, १ को मृत्यु
सन् २०२४ मा आजकै दिन सिंगापुर एयरलाइन्सको विमान आकाशमा उड्दै गर्दा टर्बुलेन्समा फस्दा एक यात्रीको ज्यान गएको थियो। घटनामा १०० भन्दा बढी घाइते भएका थिए। लन्डनबाट सिंगापुर जाँदै गरेको उक्त विमान म्यानमारको आकाशमा उडिरहेको थियो।
– सन् २०२५- अमेरिकालाई कतारको उपहार “लक्जरी विमान”
सन् २०२५ मा आजकै दिन कतारले अमेरिकाको रक्षा मन्त्रालयलाई बोइङको लक्जरी विमान ७४७ जेटलाइनर उपहार दिएको थियो। त्यस विमानलाई अमेरिका सरकारले राष्ट्रपतिको राजकीय सवारीका लागि प्रयोग गर्ने घोषणा गरेको थियो।