काठमाडौं । निर्माण व्यवसायीहरूको छाता संस्था नेपाल निर्माण व्यवसायी महासंघ (एफक्यान) को अध्यक्षमा निर्वाचित निकोलस पाण्डेको नेतृत्वमा विजयी टिमले बधाई तथा शुभकामना कार्यक्रम आयोजना गरेको छ । राजधानीस्थित अर्पण ब्याङ्क्वेटमा आयोजित कार्यक्रममा विजयी सबै पदाधिकारी तथा सदस्यहरूलाई खादा र मालासहित सम्मान गरिएको थियो ।
कार्यक्रममा नवनिर्वाचित अध्यक्ष पाण्डेले निर्वाचन सफलतापूर्वक सम्पन्न गर्न योगदान पुर्याउने निर्वाचन मण्डल, मतदाता, शुभेच्छुक, पत्रकार तथा सुरक्षाकर्मीप्रति आभार व्यक्त गरे । उनले महासंघलाई सबैलाई समेटेर अगाडि बढाउने प्रतिबद्धता व्यक्त गर्दै एकता र सहकार्य नै सफलताको आधार हुने उल्लेख गरे ।
उक्त अवसरमा सहभागीहरूले नवनिर्वाचित नेतृत्वलाई बधाई तथा सफल कार्यकालको शुभकामना व्यक्त गरेका थिए । कार्यक्रममा व्यवसायीहरूको उल्लेख्य उपस्थिति रहेको थियो भने आपसी समन्वय र सहकार्यमार्फत महासंघलाई थप सशक्त बनाउने प्रतिबद्धता व्यक्त गरिएको थियो ।
