काठमाडौँ । आगामी शुक्रबार देशभर हुने स्थानीय निर्वाचनका कारण पठनपाठन ठप्प हुने भएको छ । निर्वाचन हुने भएपछि ६ दिनसम्म विद्यालयहरू बन्द हुने भएको हो ।

सरकारले मतदानको दिन मात्रै बिदा दिने निर्णय गरे पनि सामुदायिक विद्यालयहरूमा मतदान केन्द्र राखिएकाले ६ दिन विद्यालयहरू बन्द हुने भएको हो ।

यस्तै, कतिपय शिक्षक नै निर्वाचनमा खटिएको र कतिपय मतदान गर्न जिल्ला जानु पर्ने भएकाले आजदेखि विद्यालय बन्द हुने भएको हो ।

यसअघि शिक्षा तथा मानव स्रोत विकास केन्द्रले मतदान केन्द्र कायम भएका विद्यालयमा २८ गतेदेखि ३० गतेसम्म बिदा दिन निर्देशन दिएको थियो ।

निर्वाचनको भोलिपल्ट ३१ गते शनिबार, जेठ १ गते सरकारले निर्णय गरेको आइतबारको दिन बिदा, जेठ २ गते बुद्ध जयन्ती रहेको छ । जसका कारण आजदेखि आगामी जेठ ३ गतेसम्म विद्यालय बन्द हुने भएको हो ।