काठमाडौं- संसारभरका मानिसले आवश्यकताभन्दा दोब्बर नुन खाइरहेको विश्व स्वास्थ्य संगठन (डब्लूएचओ)ले जनाएको छ।
डब्लूएचओका अनुसार बर्सेनि १९ लाखजनाको मृत्युको कारण पनि शरीरको आवश्यकताभन्दा दोब्बर बढी नुन खानु हो। एक स्वस्थ मानिसका लागि दैनिक ५ ग्रामभन्दा कम नुन आवश्यक हुन्छ। तर, अहिले दैनिक १० ग्रामभन्दा बढी नुन खाइरहेको पाइएको छ।
भारतका नागरिकले दैनिक औसत ८ ग्राम नुन खाने गरेको इन्डियन काउन्सिल अफ मेडिकल रिसर्चले जनाएको छ, जुन शरीरको आवश्यकताभन्दा ३ ग्राम बढी हो।
आवश्यकताभन्दा बढी नुनको सेवनले उच्च रक्तचाप बढाउँछ। त्यसबाट मुटु रोग, ग्यास्ट्रिक, क्यान्सर र मिर्गौला रोगको जोखिम बढ्छ। ती सबै बिमारी प्राणघातक मानिन्छन्। मोटोपनको एउटा कारण पनि नुनको अधिक सेवन मानिएको छ।
बढी नुन खाँदा के हुन्छ ?
– बढी नुन खाँदा त्यसलाई पातलो बनाउन ज्यादा प्यास लाग्छ
– आवश्यकताभन्दा बढी नुन फिल्टर गर्न मिर्गौलाले हेभी काम गर्नुपर्छ।
– त्यसबाट रगतको मात्रा र रक्तचाप दुवै बढाउँछ
– अधिक रगत उत्पादन हुँदा मुटुले पम्पिङ गर्न ज्यादा मिहिनेत गर्नुपर्छ।
– त्यसबाट मुटु रोग, स्ट्रोक, मिर्गौला रोग र मिर्गौलामा पत्थरीका समस्या निम्तिन्छ
– जब मिर्गौलाले ज्यादा नुन फिल्टर गर्न सक्दैन, रगतमा नुनको मात्रा अत्यधिक बढ्छ।
नुन कम गर्न यस्तो भोजन
– ज्यादा नुनिलो र प्रोसेस्ड फुड नखानूस्
– केचप र सस खानबाट बच्नूस्
– प्याकेज्ड फुड नखानूस्
– ताजा फल र सागसब्जी खानूस्
– खानामा फ्लेभर मिलाउनुको साटो सादा खानामा जोड दिनूस्
– नुनको साटो स्वादका लागि धनिया, ज्वानोजस्ता हर्ब्समा जोड दिनूस्
– चिप्स, चिज बल्सजस्ता प्याकेज्ड फुडमा अत्यधिक नुन हुन्छ। त्यसैले प्याकेज्ड फुड नखानूस्।