यस देशमा चोरिएको छ
रीति, थिति, इमानदारी, इज्जत
शान्ति, धर्म, कर्म, मिहिनेत

कोही कता कोही कतै
लागेका छन् सबै खोज्‍न

जसले चोरेका छन्
उनी नै बढी खोज्‍न व्यस्त छन्

चोर्नेहरू नै
ठूलो स्वरमा कराउँछन् पनि
खोज्‍ने जिम्मा उनकै हो भनेर

लुकाएका छन् आफ्ना महलभित्र
व्यापारीको खल्तीमा
विदेशी बैंकमा
ठूलो ताल्चा ठोकी
फलामका भारी सेफमा

नयाँ पुस्ता बाटोमा उभिएर कराउँदै छन्
भर नगर ती चोरहरूको
ठग्‍न सक्ने गरी ठगे
हाम्रा बाजे बज्यैलाई
हाम्रा आमा बाबुलाई

अब त्यो सबै हामीले नै खोज्‍ने छौं
फेला पारे
लुकाउनेलाई तुरुङमा हाल्ने हो !