काठमाडौं- ६ जिल्लामा भएका फरक अलग–अलग दुर्घटनामा ६ जनाको मृत्यु भएको प्रहरीले जनाएको छ।
केन्द्रीय प्रहरी समाचार कक्षका अनुसार दैलेख चामुण्डा बिन्दाशैनी नगरपालिका–६ लैनचौवरस्थित सडकमा क.प्र.००१ त ००१९६ नम्बरको ट्याक्टर शनिबार दिउँसो दुर्घटना हुँदा सहचालक भैरबी गाउँपालिका–३ का पवन विकको घटनास्थलमै मृत्यु भएको छ। फरार रहेका ट्याक्टर चालकको प्रहरीले खोजी गरिरहेको छ।
धनुषा मिथिला नगरपालिका–२ राघोपुरस्थित सडकमा ढल्केवरबाट जनकपुरतर्फ जाँदै गरेको प्र.२–०२–००२ प ३०५३ नम्बरको मोटरसाइकल अनियन्त्रित भई शनिबार दिउँसो दुर्घटना हुँदा त्यसका चालक महोत्तरी बर्दिवासका सञ्जीप श्रेष्ठको मृत्यु भएको छ। दुर्घटनामा गम्भीर घाइते भएका उनको प्रादेशिक अस्पताल जनकपुरमा उपचार क्रममा मृत्यु भएको हो।
यस्तै, रौतहट चन्द्रपुर नगरपालिका–४ स्थित सडकमा हाल नम्बर नखुलेको सवारी साधनको ठक्करबाट पैदलयात्री सोही नगरपालिका–४ ठारा टोलका हरि गौतमको शनिबार राति मृत्यु भएको छ। ठक्करबाट गम्भीर घाइते भएका उनको चपुर प्रालि अस्पतालमा उपचार क्रममा मृत्यु भएको हो। ठक्कर दिने सवारी साधनको प्रहरीले खोजी गरिरहेको छ।
कास्की अन्नपूर्ण गाउँपालिका–१ लेवाडेस्थित सडकमा ग.१८ प ८१९१ नम्बरको मोटरसाइकल र ग.२ च ३५२५ नम्बरको कार ठक्कर खाई आइतबार बिहान दुर्घटना हुँदा मोटरसाइकलमा सवार पर्वत कुश्मा नगरपालिका–४ की सुविना पुनको मृत्यु भएको छ। दुर्घटनामा गम्भीर घाइते भएकी उनको मेट्रोसिटी अस्पतालमा उपचारको क्रममा मृत्यु भएको हो। साथै दुर्घटनामा घाइते भएका मोटरसाइकल चालक पर्वत कुश्मा नगरपालिका–४ का जितबहादुर पुनको सोही अस्पतालमा उपचार भइरहेको छ। हाल फरार कार चालकको प्रहरीले खोजी गरिरहेको छ।
डोटी शिखर नगरपालिका–१ कालागाडस्थित सडकमा से.१ त ९२६४ नम्बरको ट्याक्टर अनियन्त्रित भई सडकबाट खसेर आइतबार बिहान दुर्घटना हुँदा ट्याक्टरले च्यापिएर त्यसका चालक धनगढी उपमहानगरपालिका–१ का प्रेमकुमार कठरियाको घटनास्थलमै मृत्यु भएको छ। दुर्घटनामा घाइते भएका ट्याक्टरमा सवार शिखर नगरपालिका–२ कठालीकी कलावती बोगटीको सुजङ अस्पताल राजपुरमा उपचार भइरहेको छ।
यस्तै, कपिलवस्तु वाणगंगा नगरपालिका–१० मेचकुरी डाँडास्थित सडकमा लु.३१ प ३३७ नम्बरको मोटरसाइकल अनियन्त्रित भई आइतबार दिउँसो दुर्घटना हुँदा त्यसका चालक सोही ठाउँका २८ वर्षीय अनिल थारुको मृत्यु भएको छ। दुर्घटनामा गम्भीर घाइते भएका उनको सामुदायिक अस्पताल चार नम्बरमा उपचारको क्रममा मृत्यु भएको हो।