वीरगञ्ज- विद्युत् प्राधिकरणको ६६ केभी प्रसारण लाइनबाट विद्युत् आपूर्ति लिएका बारा–पर्सा कोरिडोरका औद्योगिक ग्राहकले अहिले ऊर्जाको चरम अभाव भोगिरहेका छन्। प्रसारण लाइनबाट आपूर्ति लिएका उद्योग प्रतिष्ठानमा दैनिक १२ घण्टासम्म अघोषित लोडसेडिङ भइरहेको उद्यमीहरूको भनाइ छ।
प्राधिकरणले नेपाललाई लोडसेडिङमुक्त घोषण गरे पनि पछिल्लो समयमा ऊर्जा संकट देखिएको छ। त्यसको प्रभाव औद्योगिक ग्राहकमा परेको छ। बढी ऊर्जा खपत गर्ने र नियमित आपूर्ति चाहिने उद्योगको उत्पादन २५-३० प्रतिशतमा झरेको छ।
‘दैनिक १०-१२ घण्टासम्म विद्युत कटिरहेको छ। यस्तोमा कसरी उत्पादन सम्भव हुन्छ ?’ एक उद्योगीले प्रश्न गरे। प्राधिकरणको ३३ र ११ केभी प्रसारण लाइनबाट बिजुली लिइरहेका उद्योगमा आपूर्ति तुलनात्मक रूपमा कम अवरुद्ध छ। ६६ केभीका ग्राहक भने बढी मारमा छन्।
वीरगञ्ज उद्योग वाणिज्य संघका अध्यक्ष सुवोधकुमार गुप्ताका अनुसार ६६ केभीमा जोडिएका उद्योगमा दिनको १२ घण्टासम्म लोडसेडिङ र ५-६ पटक ‘ट्रिपिङ’ भइरहेको छ। अन्य प्रसारण लाइनबाट पनि आपूर्तिमा समस्या छ।
‘पछिल्ला केही वर्ष विद्युत्को सहज आपूर्तिका कारण उद्योग प्रतिष्ठानले आफ्नो क्षमता बढाएर उत्पादन थालेकोमा अहिलेको ऊर्जा अभावले समस्यामा छन्,’ उनले भने।
अहिले देखिएको समस्या अल्पकालीन भएको प्राधिकरणको ग्रिड सञ्चालन विभाग प्रमुख सुरेश भट्टराई दाबी गर्छन्। रुस–युक्रेन युद्धका कारण विश्वव्यापी ऊर्जा संकटबाट नेपाल पनि प्रभावित भएको उनको भनाइ छ। ‘यो १२-१५ दिनयताको समस्या हो, जुन चाँडै समाधान हुन्छ,’ उनले भने।
अधिक भारका कारण विद्युत् अवरुद्ध हुने समस्या आएको प्राधिकरणको भनाइ छ। तथापि, योजनामा राखिएका १३२ देखि ४०० केभीसम्मका प्रसारण लाइनलाई चाँडो निर्माण नगरिए भविष्यमा ऊर्जा पर्याप्त भए पनि आपूर्ति अवरुद्ध हुन सक्ने भट्टराईले बताए।
प्राधिकरण वीरगञ्ज वितरण केन्द्रका प्रमुख जितेन्द्रकुमार झा पनि प्रसारण लाइनमा बढी भारका कारण आपूर्तिमा समस्या थपिएको बताउँछन्। परवानीपुर-रक्सौल १३२ केभी प्रसारण लाइनमा बढी भारका कारण पटक-पटक विद्युत् काटिने समस्या देखिएको उनको भनाइ छ।