कैलाली- धनगढीमा आजदेखि सीप तथा रोजगार मेला शुरु भएको छ। धनगढी उपमहानगरपालिकाको आयोजनामा शुरु मेलाको उद्योग, वाणिज्य तथा आपूर्ति मन्त्री दामोदर भण्डारीले उदघाटन गरे।
उदघाटनपछि सम्बोधन गर्दै मन्त्री भण्डारीले नेपालमा दक्ष जनशक्तिको अभाव रहेको उल्लेख गरे। उनले यस्ता मेलाले दक्ष जनशक्ति उत्पादनमा सहयोग पुग्ने बताए। अहिले नेपालको जनशक्ति निर्यात र बाहिरबाट आयात भइरहेको उल्लेख गर्दै उनले दक्ष जनशक्तिलाई स्वदेशमै स्वरोजगार सिर्जना गर्न मेलाको भूमिका अहम् हुने बताए।
धनगढी उपमहानगरपालिकाका मेयर गोपाल हमालले यस सीप मेलाको संघीय सरकारले स्वामित्व लिए आगामी वर्ष सुदूरपश्चिमका अन्य ठाउँमा पनि सञ्चालन गर्न सुझाव दिए।
नेपाल तालिम तथा रोजगार व्यवसायी महासंघका महासचिव छत्र बमले सुदूरपश्चिमका ९ जिल्लाका ४७ स्थानीय तहबाट ४ हजार ८३० जनाले आवेदन दिएको जानकारी दिए। तीमध्ये ३९ पालिकाका १ हजार ४० जना छनोट भएका छन्। छनोट भएकाहरूलाई २९ विधामा तालिम दिइने उनले जानकारी दिए।
यस्तै, नेपाल तालिम तथा रोजगार व्यवसायी महासंघका अध्यक्ष तथा सीप मेलाका संयोजक प्रमोद पाठकले ४० दिने तालिमअन्तर्गत ३० दिन विभिन्न सीपमूलक, पाँच दिन जीवन उपयोगी र उद्यमशीलता विकास तालिम तथा दुई दिन रोजगारदाता र तालिमप्राप्त युवाबीच मेलास्थलमै अन्तक्र्रिया गराइने बताए।
सीप मेलाको आज उदघाटनको दिन तालिमका लागि छनोट हुन छुटेकाहरूको निकै बाक्लो उपस्थिति थियो।
