क्यानबेरा- पश्चिमा मुलुकमा दुई दशकयता घाँटीको क्यान्सर अत्यधिक बढेको छ। कतिपयले यसलाई महामारीकै संज्ञा दिएका छन्।
टन्सिलको क्षेत्र र घाँटीको पछाडिको भागमा हुने ओरोफेरिन्जियल क्यान्सर अत्यधिक बढेको छ। यो क्यान्सरको मुख्य कारण हुमन पेपिलोमा भाइरस (एचपीभी) हो। यही भाइरस गर्भाशयको क्यान्सरको पनि मुख्य कारक हो।
ओरोफेरिन्जियल क्यान्सर अमेरिका र बेलायतमा सर्भिकल क्यान्सरको तुलनामा आम समस्या बनेको छ। अनौठो कुरा के भने एचपीभी यौन जीवनबाट सञ्चारित भाइरस हो। खासगरी, मुख मैथुनका कारण यो भाइरस एकअर्कामा सर्छ। र, जीवनभर यौन साझेदारको संख्याले पनि यो भाइरस सर्ने अत्यधिक जोखिम रहन्छ। मुख मैथुन नगर्नेहरूलाई यो भाइरस सर्ने सम्भावना कम हुन्छ। मुख मैथुनमा सहभागी हुनेहरूलाई यो भाइरस सर्ने सम्भावना ८.५ गुणा ज्यादा हुन्छ।
खासगरी, पश्चिमा मुलुकमा मुख मैथुन गर्नेहरू अत्यधिक छन्। एक अध्ययनमा सहभागी एक हजारमध्ये ८० प्रतिशतले मुख मैथुन गर्ने गरेको पत्ता लागेको छ। तथापि, अध्ययनमा सहभागी मानिसमाझ ओरोफेरिन्जियल क्यान्सरको समस्या देखिएन। यसको कारण अज्ञात छ।
एचपीभी भाइरसबाट संक्रमित मानिसलाई निको पार्न सकिन्छ। तर, कतिपयलाई त्यसको प्रभावबाट छुटाउन सकिँदैन। शायद, त्यसको कारण ती व्यक्तिको शरीरमा प्रतिरक्षा प्रणाली कमजोर हुनु हो।
प्रतिरक्षा प्रणाली कमजोर रहेका बिरामीमा पटक-पटक यो भाइरसले समस्या गराउँछ। र, यो क्यान्सरको कारक बन्छ। सर्भिकल क्यान्सर रोक्नका लागि कतिपय मुलुकले युवतीहरूलाई खोप अभियान पनि लागू गरेका छन्। र, त्यो एचपीभी भाइरसको संक्रमण रोक्न पनि प्रभावी बन्ने अनुमान छ।
युवामा हर्ड इम्युनिटी विकसित गरेर एचपीभी भाइरसको संक्रमणबाट बचाउन सकिने अपेक्षा पनि नभएको होइन। त्यसबाट केही दशकमा ओरोफेरिन्जियल क्यान्सरमा कमी आउने अनुमान पनि छ। हर्ड इम्युनिटीले कुनै व्यक्तिलाई सुरक्षा दिन्छ नै भन्ने पनि छैन। खासगरी, देश-विदेश घुमिरहने र विभिन्न मुलुक पुगेर यौनमा आशक्त बन्ने व्यक्तिहरूलाई यो भाइरसको संक्रमणबाट बचाउन सकिने सम्भावना न्यून हुन्छ।
अझ जुन मुलुकमा युवतीहरूलाई सर्भिकल क्यान्सरविरुद्ध खोप दिइएको हुँदैन, त्यहाँ पुगेर यौन गतिविधिमा संलग्न हुने पर्यटकलाई एचपीभी भाइरसको संक्रमण हुने सम्भावना अधिक हुन्छ। अमेरिकामै सन् २०२० मा १३ देखि १५ वर्षका किशोरीहरूमध्ये केवल ५४.३ प्रतिशतलाई मात्र एचपीभी खोपको तीन डोज दिन सकिएको थियो। पछिल्ला वर्षमा बेलायत, अस्ट्रेलिया र अमेरिकालगायत मुलुकले युवालाई पनि एचपीभी खोप लगाउन प्रेरित गर्दै आएका छन्।
कतिपय यस्ता मानिस पनि यही संसारमा बाँचिरहेका छन्, जो एचपीभी खोप अभियानको विरोध गरिरहेका छन्। र, उनीहरू यति धेरै जोखिमका बावजुद स्वछन्द यौन सम्पर्कमा जोड दिन्छन्। तिनीहरू नै मुख मैथुनलाई पनि बढावा दिन चाहन्छन्। हुन त, यस्तै मानिसहरूको झुण्डले कोरोना भाइरसविरुद्धको खोप अभियानकै विरोध गरेका थिए।
साइन्स अलर्ट डट कमबाट