गाउँ-गाउँमा सिंहदरबार
पुगेको हल्ला सुनेर
बड्का भलमन्साले
सिंहदरबार हेर्ने विचार गरे

सिंहदरबार पनि हेर्न पाइने
आफ्नै जिल्लाका मन्त्रीको
अफिस पनि हेर्न पाइने
यही सोचेर
उनी सिंहदरबार छिरे

सिंहदरबार परिसरको हुल देख्दा
बडका भलमन्सालाई
असन र सिंहदरबार
छुट्याउनै गाह्रो भो

मान्छेसँग मान्छे ठोक्किने
बाटो काट्दा गाडीले किच्ला भन्‍ने डर

हिँड्दै जाँदा आफ्नै गाउँका
लौटनसँग ठोक्किन पुगे
र, थाहा पाए
नगरपालिकाको सरुवा

कसैको उपचार
र, केही गाउँघरका
स-साना कुराका लागि
सिंहदरबार चक्कर लाउँदै लौटनलाई
महिनादिन भएको रहेछ

हाम्रै गाउँका मन्त्रीलाई भेटिस्
आफ्नो गुनासो सुनाइनस् ?

लौटनले भने
बाजे हाम्रा मन्त्री आफैं
कार्यकर्ताको भीड
युट्युबको अन्तर्वार्ता दिँदै परेसान छन्

के काम गर्ने, कहिले काम गर्ने ?
बुझ्दै ठिक्क छ
कर्मचारीले टेर्दै टेर्दैनन्

मन्त्रालय जम्मा भीडको
गुनासो सुन्‍ने र
गफ चुट्ने थलो बनेको छ

ए, तेसो भए म हिँडें गाउँतिर
भेट्दैन मन्त्रीलाई

यदि गाउँमै सबै हुने भए
यहाँ भीड किन लाग्‍ने थियो ?

सिंहदरबार गाउँमा होइन कि
गाउँलाई सिंहदरबार पुग्‍न
बाध्य पारिएको रहेछ
भन्दै बड्का भलमन्सा लागे गाउँतिरै !!