काठमाडौँ । दाङको तुलसीपुर उपमहानगर ३ स्थित प्रतापकोट माविको हावाहुरीले छानो उडाउँदा विद्यार्थीको बिचल्ली भएको छ । छानो उडाएपछि एक सातादेखि पठनपाठन ठप्प भएको हो ।

गत चैत ३० गते रातिको हावाहुरीले छाएको छानो उडाएको हो । विद्यालयका प्रधानाध्यापक फष्टबहादुर राणाका अनुसार तीनवटा कक्षाको पठनपाठन हुने भवनको छानो उडाएको हो ।

अहिले विद्यार्थी घाममा बसेर परीक्षा दिन बाध्य छन् । ‘परीक्षासमेत प्रभावित भएको छ, नियमित कक्षा सञ्चालन गर्न समस्या छ,’ उनले भने ।

कक्षा ४, ५ र ६ का विद्यार्थी छाप्रोमा पढ्नु पर्ने अवस्था थियो । विसं २०२८ मा स्थापना भएको उक्त विद्यालयको भवन जीर्ण छ । पुरानो भवन भत्काएर नयाँ निर्माण गरिँदै छ ।

विद्यालय भवन निर्माण पूरा नहुँदा पठनपाठनमा बाधा पुगेको प्रधानाध्यापक राणाले बताए । गत कात्तिकमा भवन भत्काएर नयाँ निर्माण थालिएको हो । ‘छाया नेपाल’ले सँगसँगै निर्माण थालेको तुलसीपुर ७ कालाखोलास्थित भवनको काम अन्तिम चरणमा पुगेको छ । तर, अम्बासको भवन निर्माणको काम भने सुस्त गतिमा छ ।

विद्यालयका प्रअ राणाका अनुसार असार मसान्तसम्म सक्ने गरी सम्झौता भए पनि विद्यार्थीको पठनपाठनलाई मध्यनजर गरी छिट्टै पूरा गर्ने गरी अगाडि बढ्ने आश्वासन दिइएको थियो । एक करोड ४३ लाख रुपैयाँको लागतमा आठ कोठाको भवन निर्माण गरिँदै छ ।

कक्षा १० सम्म सञ्चालित उक्त विद्यालयमा हाल २४५ विद्यार्थी अध्ययनरत छन् । विद्यालयमा १४ शिक्षक कर्मचारी कार्यरत छन् ।