केही चिनेका
केही नचिनेका नयाँ अनुहार
ठम्याउनै गाह्रो
भइराखेको थियो आत्मालाई

पार्टीमा सँगै काम गरेका
नजिकै बस्‍ने
तर वर्षौंपछि देखिएका
बुढ्यौलीले ढाकेको अनुहार

इमानदार, देशभक्त,
प्रजातन्त्र ल्याउन भूमिका
पार्टीले अभिभावक गुमाएको
भनी भट्याउँदै थिए उनी

उनले देख्दै नदेखी
पार्टीको ठूलो तहमा पुगेका
घोसे मुन्टो लगाएर बसेका
अर्को कार्यक्रममा जान
पटक-पटक घडी हेर्दै
गरेका युवा नेता

कोही आ-आफ्ना पार्टीका
नेतालाई आफ्नो उपस्थिति देखाउन
घाँटी तन्काउँदै ङिच्च दाँत देखाउँदै
नमस्कार गर्दै गरेका तहबेदार

कोही फोन गर्दै
किन नआएको
खोजी हुँदै थियो
भनी जनाउ दिँदै
गरेका शुभचिन्तक

आत्माले भन्दै थियो
म त हिँडें
सम्झने मन छ सम्झिनु
छैन भने बिर्सनु
यस्तै हो जिउँदै हुँदा बिर्सने
मरेपछि सम्झने समाज
जय नेपाल