नयाँदिल्ली- गर्मी सकिएसँगै जाडोयाम शुरु भएको छ। र, जाडोमा हुने बिरामीहरूको ग्राफ पनि उकालो लागेको छ।
मौसम बदलिने क्रमसँगै धेरै मानिस बिरामी पर्छन्। त्यसका विभिन्न कारण छन्। तर, मुख्य कारण चिसो हावा र शुष्क वातावरण प्रमुख हुन्।
जाडोयाममा शारीरिक गतिविधि कम हुँदा पनि बिरामी पर्ने सम्भावना ज्यादा हुन्छ। यस्तै, कोठाभित्रै लामो समय बिताउँदा पनि बिरामी पर्ने सम्भावना हुन्छ। यस्तै, घरमा भेन्टिलेसन अभावमा पनि भाइरसको संक्रमणमा पर्ने जोखिम रहन्छ।
यी हुन् बिरामीका कारण
– जाडोयाममा हावामा नमी कम हुन्छ। र, भाइरस र ब्याक्टेरियाबाट सुरक्षा दिने म्युकस झिल्ली सुख्छ।
– म्युकस झिल्ली सुकेपछि त्यसमा दरार पैदा हुन्छ। र, त्यसमार्फत ब्याक्टेरिया र भाइरस सहजै शरीरमा प्रवेश गर्छन्।
– जाडोयाममा शरीरलाई न्यानो बनाइराख्न ज्यादा ऊर्जाको आवश्यकता हुन्छ। त्यसकारण हाम्रो शरीरको रोग प्रतिरोधात्मक क्षमतामाथि दबाब पर्छ।
– प्रतिरोधात्मक क्षमतामाथि दबाब पर्दा बिरामी पर्ने जोखिम बढ्छ। अझ लापरवाही गरियो भने त बिरामी परिन्छ नै।
– जाडोयाममा मानिसहरू बढीजसो घरभित्रै बिताउँछन्, जहाँ भेन्टिलेसन कम हुन्छ।
– झ्याल र ढोका बन्द रहँदा भित्रै भाइरस संक्रमणको जोखिम बढ्छ।
– यी सबै कारणबाट जाडोमा सर्दी, खोकी र अन्य प्रकारका बिरामीको जोखिम अधिक रहन्छ।
कसरी बच्ने बिमारीबाट ?
– बन्द ठाउँहरूमा पनि मास्क पहिरिँदा भाइरसको सम्पर्कमा आउने सम्भावना कम रहन्छ।
– हरियो सागसब्जी, मौसमी फललगायत रोग प्रतिरोधात्मक क्षमता बढाउने खानेकुरा खाऊँ।
– जाडोयाममा कम प्यास लाग्छ। मानिस पानी पिउन कम गर्छन्, जसले बिरामी बनाउने सम्भावना बढाउँछ। त्यसैले प्रशस्त पानी पिऊँ।
– रोग प्रतिरोधात्मक क्षमता बढाउन पर्याप्त निन्द्रा पुर्याऊँ। निन्द्राले शरीरलाई रिकोभर गर्छ।
– इन्फ्लुएन्जा र मौसमी भाइरसबाट बच्न भ्याक्सिन पनि लगाउन सकिन्छ।
रोग प्रतिरोधात्मक क्षमता बढाउने तरिका
– अदुवा र बेसारको काँढा बनाएर पिऊँ। त्यसमा एन्टी-इन्फ्लेमेटरी गुण भरपुर हुन्छ। त्यसले रोग प्रतिरोधात्मक क्षमता बढाउँछ।
– तुलसी र मरिचको काँढा बनाएर पिउँदा घाँटी र छातीको संक्रमणबाट बच्न सकिन्छ।
– सुन्तला, कागती, अम्बक, अमला र ब्रोकाउलीमा भिटामिन सी प्रशस्त पाइन्छ। र, त्यसले रोग प्रतिरोधात्मक क्षमता बढाउँछ।
– सूर्यको प्रकाशबाट पर्याप्त भिटामिन डी पाइन्छ। च्याउ र दूधबाट पनि भिटामिन प्राप्त हुन्छ।
– ओखर, बदाम, मटर र पालकमा प्रचुर मात्रामा जिंक पाइन्छ। त्यसले शरीरलाई पोषण प्रदान गर्छ।
– मह र बेसारमा एन्टी-ब्याक्टेरियल गुण हुन्छ, जसले रोज प्रतिरोधात्मक क्षमता बढाउँछ।
भास्कर डट कमबाट