गत २९ चैतमा तीन दशकभन्दा बढी एमालेमा खर्चिएका झापा मेचीनगरका डिल्लीराम घिमिरेले आँशु बगाउँदै पार्टी परित्याग गरेको घोषणा गरे। उनी कुनै पार्टीमा प्रवेश गर्ने मनिस्थितिमा छैनन्। त्यसैले स्वतन्त्र हैसियतमा मेचीनगर नगरपालिकाको उम्मेदवार बन्ने तयारीमा छन्।
उनको तयारी अर्को पनि छ। एमालेका मेयर उम्मेदवारले जित्ने अवस्था देखियो भने उनलाई हराउन मेयरमै उम्मेदवारी दिने सोचमा पनि छन्। तर, गठबन्धनबाट मेचीनगरका उम्मेदवार बन्नेले नै जित्ने सम्भावना बलियो रहेको उनले देखेका छन्। गठबन्धनबाट उपमेयरमा महिलालाई उम्मेदवार बनाउनु अनिवार्य छ। त्यसैले घिमिरे गठबन्धनको समेत मत प्राप्त गर्ने गरी उपमेयरको उम्मेदवार बन्ने तयारीमा लागेका हुन्।
एमालेबाट प्रदेश सांसद गोपाल बुढाथोकी मेचीनगरमा मेयरको उम्मेदवार बन्ने सम्भावना प्रबल छ। गठबन्धनबाट कांग्रेसका इन्द्र बुढाथोकी र केशवराज पाण्डेमध्ये एकजना मेयरको उम्मेदवार बन्ने सम्भावना देखिएको छ।
केपी ओलीको गृह जिल्लाका घिमिरेले आँशु बगाउँदै छाडे एमाले
अर्को पार्टीमा प्रवेश गर्ने हल्लाबारे सोधिएको प्रश्नमा घिमिरेले भने, ‘म कुनै पार्टीमा प्रवेश गर्दिनँ, स्वतन्त्र हैसियतमा चुनाव लड्छु र जित्छु पनि। यति लामो समय मेचीनगरवासीको सेवा गरेको फल प्राप्त हुन्छ भन्नेमा विश्वस्त छु।’
३१ वर्षदेखि पार्टीको काममा खटिँदै आएका उनले आफू मेयरको उम्मेदवार सिफारिसमा नपरेको बताउँदै पत्रकार सम्मेलन गरी एमाले छाडेका थिए। पत्रकार सम्मेलनमा भक्कानिएका उनले आँशु थाम्न सकेका थिएनन्।
सहकर्मीहरूले आफूलाई बारम्बार अन्याय गरेको उनले आरोप लगाएका थिए। र, बाँकी जीवन स्वतन्त्र भएर बाँच्ने बताएका थिए। पार्टीका केही नेताले आफ्नो अवमूल्यन गरी बारम्बार अवसरबाट बञ्चित गरिरहेको उनको भनाइ थियो। र, एमाले नेताहरूले नै आफूलाई पार्टी परित्याग गर्न बाध्य बनाएको उनले बताएका थिए। एमालेभित्र विवाद चरमोत्कर्षमा रहँदा उनी कुनै पनि हालतमा एमाले फुट्नु हुँदैन भन्ने वकालत गरिरहेका थिए।
