आमा मलाई खुब पैसा कमाउने मन छ
त्यसैले राजनीतिमा जाने मन छ

जनतालाई नोकर बनाई
आफू राजा हुने मन छ

तिमीलाई ठूलो घरमा राख्‍ने र
पजेरोमा घुमाउने मन छ

टपरीमा खाएको बिर्सिएर
सुनको थालमा भात खाने मन छ

गाउँबाट आउँदा लगाएको फाटेको पाइन्ट
च्यातिएको चप्पल लुकाउने मन छ

आसेपासेलाई जागिर
चाकरेलाई नियुक्ति दिने मन छ

नीति आफूलाई सजिलो हुने
कानून चोर्न मिल्ने बनाउने मन छ

विदेशी बैंकमा खाता खोली
पैसा ढुसी लगाएर राख्‍न मन छ

अरूको कम्पनीको
सेयर सित्तैंमा कब्जा गर्ने मन छ

श्रीमती सुनकेसरी मैयाँ
भएको हेर्ने मन छ

नालायक छोरालाई पैसा
तह लाउने व्यापारी बनाउने मन छ

अरूले थाहा नपाउने गरी
आफ्नो अतीत लुकाउने मन छ

अरूलाई झ्यालखाना पठाई
आफ्नो लुटको बजार चलाइराख्‍ने मन छ

आमा मलाई खुब पैसा कमाउने मन छ
त्यसैले राजनीतिमा जाने मन छ