काठमाडौं– परराष्ट्रमन्त्री आरजु राणा र नेपालका लागि रुसी राजदूत अलेक्सी नोभिकोभबीच भेटवार्ता भएको छ।
बुधबार भएको भेटवार्तामा उनीहरूबीच द्विपक्षीय सम्बन्धको वर्तमान अवस्थाबारे छलफल भएको रसियन दूतावासले जनाएको छ। दशैंको अवसरमा रुसी राजदूतले दशैंको शुभकामना दिँदै दुई देशबीचको सुमधुर सम्बन्धको चर्चा गरेका थिए।
भेटमा सेन्ट पिटर्सबर्ग अन्तर्राष्ट्रिय युनाइटेड कल्चर फोरम र युरेशियन वुमन्स फोरमलगायत रसियामा हालै सम्पन्न अन्तर्राष्ट्रिय मञ्चहरूमा नेपालको सहभागिताबारे समीक्षा गरिएको थियो। उनीहरूबीच रुसको उफामा हुन लागेको ‘रसिया- खेलकुदको देश’ नामक अन्तर्राष्ट्रिय फोरममा नेपाली अधिकारीहरूको सम्भावित सहभागिताबारे पनि छलफल भएको दूतावासले जनाएको छ।
त्यस्तै निकट भविष्यमा हस्ताक्षर गर्ने अपेक्षा गरिएका विभिन्न द्विपक्षीय सम्झौताहरूको समीक्षा प्रक्रियालाई तीव्रता दिने विषयमा छलफल भएको थियो। उनीहरूले रुसद्वारा सञ्चालित छात्रवृत्ति कार्यक्रमअन्तर्गत रुसमा अध्ययन गर्ने नेपाली विद्यार्थीको संख्या बढिरहेकोले सहयोगको सकारात्मक प्रभावबारे सन्तुष्टि व्यक्त गरेका थिए।