काठमाडौँ । सरकारलाई अझै चारवटा क्यासिनोले बक्यौता बुझाएका छैनन्। जसअन्तर्गत सिल्भर हेरिटेज, सांग्रिला, याक एण्ड यती र ओरिण्टेल होटल लिमिटेड छन्।
सिल्भर हेरिटेज र सांग्रिलाले करिब १४ करोड २० लाख रुपैयाँको बैंक ग्यारेण्टी दिएको पर्यटन विभागका एक अधिकारीले जानकारी दिए। उनका अनुसार बक्यौता बुझाउन बाँकी रहेका क्यासिनोलाई बैंक ग्यारेण्टी खिच्ने पत्र पठाइएको भए पनि अझै बक्यौता बुझाइसकेको छैन।
सिल्भर हेरिटेजको एसएल व्यवस्थापनको १४ करोड २० लाख रुपैयाँ यो महिनाभित्र राजस्व खातामा राख्ने बताएको छ। यस्तै, याक एण्ड यतीको क्यासिनोले ४२ करोड रुपैयाँ बक्यौता बुझाउन बाँकी छ।
रक इन्टरनेसनल प्रा.लि.ले रोयल्टी बुझाइसकेको भए पनि नवीकरण बाँकी नै छ। यो क्यासिनोले करिब ११ करोड रुपैयाँ बुझाउन बाँकी छ। यससँगै ओरिण्टेल होटल लिमिटेडले २८ करोड बुझाउन बाँकी थियो। तर, सर्वोच्च अदालतको आदेशपछि यो क्यासिनो करिब दुई वर्ष बन्द भयो। हाल यसले १८ करोड रुपैयाँ बुझाउन बाँकी छ।
नियमित बक्यौता बुझाउने क्यासिनोहरू पनि छन्। सेन्टर मिडिया प्रा.लि.ले चालू आर्थिक वर्षसहितको १५ करोड ६० लाख रुपैयाँ बुझाएको छ। यसबाहेक ह्याप्पी आवरले दुई करोड ५० लाख रुपैयाँ बुझाएको छ। विभागका ती अधिकारीका अनुसार हालसम्म करिब एक अर्ब रुपैयाँ बक्यौता उठाएको छ। हाल देशभरमा साना–ठूला गरी ३३ वटा क्यासिनो सञ्चालित छ।