काठमाडौँ । नेकपा एमालेका अध्यक्ष केपी शर्मा ओलीले आफूलाई पार्टीको साधारण सदस्यबाट निकालेको स्मरण गरेका छन्। उनले आफूलाई एक वर्षअगाडि पार्टीको साधारण सदस्यबाट निकालेको बताउँदै यसलाई कार्यकर्ताले बचाएको बताए।
यस्तै, उनले पार्टीको अवस्था नाजुक हुँदा कार्यकर्ताले साथ दिएकाले आगामी निर्वाचनमा विजयी हुने दाबी गरे। उनले भने, ‘तपाईहरूले पार्टीलाई विजयी गराइसक्नुभएको छ, यसका लागि अझै गाउँमा पुगेर काम गर्नु पर्ने बेला आएको छ।’
यस्तै, एमाले सम्पर्क समन्वय कमिटीले शनिबार आयोजना गरेको कार्यकर्ता भेलालाई सम्बोधन गर्दै अध्यक्ष ओलीले मुद्दा जितेर आएका झगडियालाई जनतामा जाने अधिकार नरहेको बताए।
‘यो अदालतले बनाइदिएको गठबन्धन हो, जनताले हो र गठबन्धन बनाइदिएको ? भोटले हो र ? यस्तालाई जनताको आँगनमा लगेर पछार्नु पर्छ,’ उनले भने, ‘अदालतले बनाएको सरकारलाई मुद्दा लड्न जाउ भन्ने हो, हामी जनताको बीचमा जाने हो।’