सुरेश तिमल्सिना/काठमाडौं– “बुझ तिमिले जे मलाई, बुझेको छु आफैंलाई, सफलताको धेरै परिभाषा होलान्, मेरो बुझाईले तिमिलाई नछोलान्”, हो यस्तै यस्तै मिठास शब्द सहितको एउटा कोसेली जहाँ एक कलाकारको जीवन संघर्षलाई कथावस्तु बनाएर प्रस्तुत गरिनेछ नेपाली म्युजिकल पोईट्री जसलाई नामाकरण गरिएको छ “कालो प्रकाश”।
बिषम आचार्यको संगीतमा निर्माण हुन लागेको पोईट्रीलाई राज शेर्माले लेखन तथा निर्देशन गर्दैछन। तयार हुन लागेको ‘कालो प्रकाश’मा कलाकारितामा बिहानीपख सुर्यको किरण उदाए जसरी अनवरत संघर्षसहित उदाईरहेका कलाकार बिराज बास्कोटा मुख्य भुमिकामा प्रस्तुत हुनेछन्। उनी बिगत लामो समयदेखि कहिले थियटर नाटक, कहिले टेलिसिरियत त कहिले म्युजिक भिडियोमा आफ्नो अभिनय मार्फत दर्शकको मन लोभ्याउदै आईरहेका छन्। म्युजिकल पोईट्रीमा भने उनको यो पहिलो प्रयास हो। जसमा आफू उत्कृष्ट ढंगले प्रस्त्तुत हुने सोचका साथ प्रयत्न गरिरहेको उनी बताउँछन।
बिराजसंगै कलाकार उत्तम केसी नेपाल, रश्मी पाण्डे, जेसिका पोख्रेल, सबृना क्षेत्री, एलिना थपलिया लगायतको अभिनय रहनेछ। भिडियोको छायांकन योगेश दाहालले गर्नेछन भने श्रृङ्गार बिक्रम गौतमको रहनेछ।
लेखक तथा निर्देशक राज शेर्मा भन्छन्, “यदि कोहि मानिस इन्जिनियरिङ् अध्ययन गर्दैछ भने उ भोलिको इन्जिनियर हो। जुन निस्चय छ। यदि कोहि डाक्टर बन्ने तयारीमा अध्ययन गर्दैछ भने उ भोलिको डाक्टरनै हो, तर कलाकारहरूको भविष्य भन्न सकिदैन। उ भोलि बल्न नि सक्छ नबली निभेर जान पनि सक्छ अर्थात सफलता र असफलताको कुनै निश्चित हुँदैन। सफल भए त ठिकै छ यदि भएन भने अनि उसले गरेको संघर्ष, गुमाएका समय, अनि जिम्मेवारीहरू? हो यस्तैयस्ता कुरा ‘कालो प्रकाश’ मा चित्रण गर्न खोजिएको छ।”
आगामी जेठ १० गते बुद्ध जयन्ती साथै उभौली पर्वको अवसर पारेर ‘कालो प्रकाश’को प्रदर्शन गरिने निर्देशक शेर्माले बताए।
