काठमाडौं– सिधाकुरा डटकममा प्रकाशित सामग्री प्रकरणमा सर्वोच्च अदालतमा सिधाकुरा डटकमका प्रकाशक युवराज कँडेलको बयान सकिएको छ। तर कार्यकारी सम्पादक नविन ढुंगानाको बयान बाँकी रहेको भन्दै अदालतले शुक्रबार १० बजे अदालतमा उपस्थित हुन आदेश दिएको छ।

त्यस्तै सर्वोच्च अदालतले सिधाकुरा डटकमबाट प्रसारित डार्क फाइल सिरिजलाई अडियो सामग्री उपलब्ध गराउने राजकुमार तिमिल्सिनालाई पनि बयानका लागि झिकाउने आदेश दिएको छ।

न्यायाधीशद्वय हरिप्रसाद फुयाल र महेश शर्मा पौडेलको संयुक्त इजलासले तिमिल्सिनालाई वैशाख २३ गते बयानका लागि अदालतमा उपस्थित गराउन आदेश दिएको हो।

आदेशमा भनिएको छ, “बयानका क्रममा प्रकाशक युवराज कँडेलले प्रसारित अडियो सामाग्रीको स्रोत ललितपुर गोदावरी बस्ने राजकुमार तिमिल्सिना भनी खुलाएको देखिएको (फोन नं. ९७६०८२१३३३ इमेल timilsinnaaarosn@gmail.com) र Dark File-2 र 3 मा निजले अन्तर्वार्ता दिएको भन्ने देखिएको हुँदा निजलाई समेत उल्लिखित अडियो भिडियो सम्बन्धमा अदालतको अवहेलनामा किन कारबाही र सजाय गर्नु नपर्ने हो? त्यसरी कारबाही गर्नु नपर्ने आधार र कारण भए आफूसँग भएका सवुद प्रमाणसहित बयानका लागि यस अदालतमा उपस्थित हुनु भनी फोन र इमेलबाट जानकारी लिई त्यसको अभिलेख राख्नु।”