कैलाली– सुदुरपश्चिम प्रदेशमा मुख्यमन्त्रीकाे दाबी पेश गर्ने अन्तिम दिन आइतबार केन्द्रिय गठबन्धनलाई चुनौती दिदै नयाँ गठबन्धन बनेकाे छ। सुदूरपश्चिममा रेशम पक्षीय नागरिक उन्मुक्ति पार्टीले मुख्यमन्त्रीमा दाबी गर्ने भएको हो।
नेपाली कांग्रेस संससदीय दलका नेतासमेत रहेका कामचलाउ मुख्यमन्त्री कमलबहादुर शाहले सहमतिपत्रमा हस्ताक्षर गरी मुख्यमन्त्रीका लागि नागरिक उन्मुक्ति पार्टीका लक्ष्मणकिशोर चौधरीलाई अघि बढाउने सहमति भएको बताए।
आइतबार बिहानै बालुवाटारमा नयाँ सत्ता गठबन्धनका दलबिच उन्मुक्तिलाई मुख्यमन्त्री दिने सहमती भएकाे थियाे। जसमा पार्टीकी केन्द्रीय अध्यक्ष रन्जिता श्रेष्ठ पक्षीय कैलाश चाैधरीलाई मुख्यमन्त्री बनाउने सहमति भएको थियो। सोहि सहमति बमोजिम नागरिक उन्मुक्तिकी अध्यक्ष श्रेष्ठ आजै धनगढी आउँदैछिन्। तर, यता नेपाली कांग्रेस, नेकपा एकीकृत समाजवादी र नाउपा रेशम पक्षको अलग्गै समझदारी भने बनिसकेको छ।
समाजवादीका संसदीय दलका नेता दीर्घ सोडारी, नाउपा संसदीय दलका नेता घनश्याम चौधरी, कांग्रेस संसदीय दलका नेताबिच समझदारी बनेको शाहले बताए। यहाँ बहुमत सरकार निर्माणको लागि २६ सिट भए पुग्छ। कांग्रेसको १८, समाजवादीको ४ र नाउपा (रेशम पक्षीय) ४ गरी २६ पुग्छ।
प्रदेश सरकार गठनका लागि २७ जना चाहिन्छ। तर ५३ सदस्यीय सुदूरपश्चिम प्रदेशसभामा एक जनाको निधन भएका कारण २६ जना मात्रैको पनि बहुमत पुग्ने भएकाले आजै प्रदेश प्रमुख समक्ष दाबी पेश गर्न लागेको नाउपाका लक्ष्मण किशोरले बताए। नाउपाकी इन्दिरा गिरीलाई पदमुक्त गरिएपछि हाल प्रदेशमा ५१ सदस्य छन्।