पर्वत– पर्वतको जलजला गाउँपालिका २ मल्लाजको दहमा आफ्नै घरमा सुतिरहेका दम्पतीको हत्या प्रकरणबारे प्रहरीले अनुसन्धान गरिरहेको छ। मंगलबार स्थानीय ६९ वर्षीय सूर्यबहादुर जिसी र उनकी श्रीमती अन्दाजी ६७ वर्षीया कमला जिसी आफ्नै घरभित्र मृतावस्थामा भेटिएका थिए।

दम्पतीको हत्या लुटपाट गर्ने उद्देश्यले भएको हुनसक्ने प्रहरीको प्रारम्भिक अनुसन्धान निष्कर्ष छ। सुर्यबहादुरले लगाएको सुनको औँठी तथा कमलाको सिक्री र कानको रिङ लुटिएको खुलेको छ।

प्रहरीले शंकास्पद व्यक्तिहरूसँग सोधपुछ गरिरहेको छ। जिल्ला प्रहरी कार्यालय पर्वतले अनुसन्धानको क्रममा सोधपुछका लागि शंकास्पद दुई आफन्तलाई नियन्त्रणमा लिइएको बताएको छ। हत्यापछि उनीहरू त्यहाँ नदेखिएकोले प्रहरीले उनीहरूलाई सोधपुछका लागि नियन्त्रणमा लिएको बताएको छ।

हत्या भएका दम्पतीको शव बिहान ९ बजे भेटिएको थियो भने दुवै जना रगताम्य अवस्थामा भेटिएका थिए। स्थानीयले श्रीमान-श्रीमती नै मृतावस्थामा देखेपछि जिल्ला प्रहरी कार्यालय पर्वतमा खबर गरेका थिए। स्थानीयको खबर लगत्तै जिल्ला प्रहरी कार्यालय पर्वतवाट गएको टोलीले घटनाको अनुसन्धान गरिरहेको जिल्ला प्रहरी कार्यालय पर्वतका प्रमुख प्रहरी नायब उपरीक्षक खुमलाल भुसालले बताए।

घरभित्र दम्पती मृत फेला परेका थिए भने घरको ढोकामा भने बाहिरबाट ताल्चा लगाइएको थियो। उनीहरूको टाउको र घाँटीमा चोट भेटिएको प्रहरीले जनाएको छ। हत्यामा प्रयोग भएको हँसिया प्रहरीले बरामद गरेको छ।

घरमा जिसी दम्पती मात्रै बस्दै आएका थिए। दम्पतीका २ छोरा वैदेशिक रोजगारीका लागि कोरिया गएका र एक छोरा म्याग्दीको बेनीबजारमा बस्दै आएका छन्।