नारायणगोपाल चोकमा उभिएका
बडका भलमन्सा बडो द्विविधामा छन्
बालुवाटार जाने बस चढ्ने कि
बूढानीलकण्ठ जाने ?

ठग्गाले भनेछ
काका बूढानीलकण्ठका काजी
जहिले पनि रिसाइराख्छन्
आफ्नै गाउँ ठाउँका भए पनि
कुरै गर्दैनन्

बालुवाटारे कमरेट
आफ्नो गाउँ ठाउँको नभए पनि
मज्जाको गफ ठोक्छन्
लात्ताले हान्‍न पनि बेर लाउँदैनन्

अहिले हालिमुहाली पनि तिनकै छ
त्यहाँ गए केही पाइन्छ पनि
त्यसैले त्यतै जाने बस चढम्

बडका भलमन्साले भनेछन्
भतिज यो नेपाल हो
कुन समय कसको
पलडा भारी हुन्छ थाहा हुन्‍न

सबै सबैतिर मिलेका छन्
लुकी-लुकी भेटेका छन्
तँ बूढानीलकण्ठ जाने बस चढ्
म बालुवाटारको
साँझ बालकोटमा भेटौंला
दुवै ठाउँ भएको कुरा त्यहाँ ओकलौंला