मुम्बई- गुटखाको विज्ञापन खेलेका तीन बलिउड अभिनेताहरू विरुद्ध भारतको केन्द्र सरकारले नोटिस पठाएको छ।

फिल्म स्टार अक्षय कुमार, शाहरुख खान र अजय देवगनविरुद्ध नोटिस पठाइएको सरकारले जनाएको छ। उनीहरू अलग–अलग गुटखा कम्पनीका विज्ञापनमा देखिएका छन्।

उनीहरूले खेलेको गुटखा कम्पनीको विज्ञापनविरुद्ध लखनऊ उच्च अदालतमा रिट दायर भएको थियो। अदालतले सरकारलाई उनीहरू विरुद्धको रिटमा कारण देखाउ आदेश जारी गरेको थियो।

समाचार एजेन्सी पीटीआईका अनुसार केन्द्र सरकारले गत शुक्रबार उच्च अदालतलाई त्यससम्बन्धी मुद्दा सर्वोच्च अदालतमा विचाराधीन रहेकाले उच्च अदालतको रिट खारेज हुनुपर्ने जिकिर गरेको थियो।

रिट दायर गर्नेहरूले ती अभिनेता र सेलिब्रिटीहरू माथि कारवाही हुनुपर्ने माग गरेका छन्, जो हाई प्रोफाइल पुरस्कार पाउँछन् अनि गुटखा कम्पनीको विज्ञापनमा देखिन्छन्।