वासिङ्टन- हमास युद्धबारे गरिएको टिप्पणीका कारण मेटा र गुगल यस वर्षको अन्तर्राष्ट्रिय ‘वेब समिट’बाट अलग भएका छन्।
उक्त समिट प्रविधि क्षेत्रमा बर्सेनि आयोजना हुने सबैभन्दा ठूलो सम्मेलन हो। यस वर्षको समिटमा संसारभरका २ हजारभन्दा बढी स्टार्टअप कम्पनी सामेल हुँदै छन्।
वेब समिटको आयोजकले हमासमाथि इजरायलको सैन्य कारवाहीप्रति आपत्ति जनाएको थियो। सोही कारण मेटा र गुगलले समिटमा सहभागी नहुने घोषणा गरेका हुन्।
आयरल्यान्डका उद्यमी तथा वेव समिटका सह–संस्थापक प्याडी कोसग्रेभले सामाजिक सञ्जालमा लेखेका थिए, ‘कतिपय पश्चिमी सरकारहरू र नेताहरूको मन्तव्य र कामहरूबाट हैरान छु। युद्ध अपराध भनेको युद्ध अपराध नै हो। भलै त्यो मित्र राष्ट्रले नै किन नगरुन्। उनीहरूले यही बुझ्नुपर्छ।’
उक्त अभिव्यक्तिको चर्को विरोध भएपछि प्याडीले माफी मागेका थिए। र, इजरायलमा हमासको बर्बर आक्रमणको आलोचना गर्छु भनेका थिए। अनि इजरायलको अधिकारको समर्थन गर्छु भनेका थिए।
प्याडीको अभिव्यक्तिलगत्तै अन्य सहभागी ठूला कम्पनीले पनि समिट बहिष्कार गर्ने घोषणा गरेका थिए। सिमेन्स र इन्टेलले पनि समिट बहिष्कार गरिसकेका छन्।
यस वर्षको वेब समिट १३-१६ नोभेम्बरमा हुँदैछ। लिस्बनमा आयोजना गरिएको समिटमा करिब २ हजार ३०० स्टार्टअप कम्पनी र ७० हजारभन्दा बढी मानिसको सहभागिता हुने अपेक्षा छ।