सुनसरी- जिल्लाको बराहक्षेत्र र उदयपुरको बेलका नगरपालिकाका जोड्ने सप्तकोशी पुलमा सडक बत्ती मर्मत सम्भार भएर बल्न थालेपछि स्थानीय बासिन्दा हर्षित भएका छन्।
पुलमा ४ वर्षदेखि सडक बत्ती नबल्दा रातको समयमा आन्तरिक र बाह्य पर्यटक, सुरक्षाकर्मी र स्थानीय बासिन्दालाई समस्या भइरहेको थियो। बत्ती मर्मत सम्भार गरी बाल्नका लागि विभिन्न व्यक्तिले बारम्बार सामाजिक सञ्जालमा आवाज उठाउँदै आएका थिए।
उक्त समस्यालाई मध्यनजर गर्दै बेलका नगरपालिकाकाले पुलमा सडक बत्ती मर्मत सम्भार गरी बालेको हो। अन्डर हिल होटलका सञ्चालक राज वान्तवाले बत्ती बाल्न आवाज उठाउने र पहल गर्ने सबैलाई धन्यवाद दिए।
पुल झिलिमिली भएपछि पर्यटन प्रबर्द्धनमा मद्दत पुग्ने ग्यालेक्सी होटेलका सञ्चालक ईश्वर गुरुङले बताए। उज्यालोमा हिडडुल गर्ने वातावरण तयार गर्न सहयोग गर्ने बेलका नगर प्रमुख र उपप्रमुख अशोक कार्की र जिरा राई तथा राज वान्तवालगायतलाई उनले धन्यवाद व्यक्त गरे।
बेलका नगरपालिकाको आर्थिक, प्राविधिक सहयोग र धरान उपनगरपालिकाको क्रेनको सहायताले सडक बत्ती मर्मत सम्भार गरी बालिएको बेलका नगरपालिकाका पर्यटन विकासका अध्यक्ष शिव थापाले जानकारी दिए। धरान उपनगरका उपमेयर अइन्द्र वेघाको पहलमा विदाको दिनमा पनि क्रेन उपलब्ध गराएको उनले जानकारी दिए। पुलमा राखिएका बत्तीहरू मर्मत सम्भार नहुँदा अँध्यारोमा हिँड्न बाध्य थिए तर अहिले रातको समयमा झलमल्ल बत्ती बलेपछि स्थानीय बासिन्दा हर्षित छन्।
पुलमा सडक बत्ती बलेपछि त्यहाँ सम्भावित दुर्घटना तथा आपराधिक गतिविधिमा कमी आउने र शान्ति सुरक्षामा मजबुत हुने स्थानीय प्रेम घिमिरेले बताए।