लन्डन- ‘मास्टर सेफ प्रोफेसनल यूके प्रतियोगिता २०२०’ का उपविजेता सेफ सन्तोष शाह फेरि मास्टर सेफको प्रतिस्पर्धामा जाने भएका छन् ।
बीबीसीबाट प्रसारण हुने हस्पिटालिटी क्षेत्रमा विश्वकै प्रतिष्ठित टीभी रियालिटी सो ‘मास्टर सेफ प्रोफेसनल यूके’मा नेपाली खाना लिएर उपविजेता बनेका सेफ सन्तोष ‘रिम्याच’अन्तर्गतको विधामा सहभागी हुन लागेका हुन् ।
यसमा अन्तिम चारजना प्रतिस्पर्धीले भाग लिन पाउनेछन् । यसपालि सन्तोषले आमाको हातबाट बनाएका तराईका बिर्या, तिलौरीजस्ता खानाका साथ प्रतिस्पर्धा गर्नेछन् ।
यसपालि उनले एउटा मौलिक परिकार ‘कुखुराको तिते’ पनि आफ्नो परिकारमा समावेश गर्नेछन् । करिब पाँच महिना नेपाल बसाइमा आफूले गरेको नेपाली खानाको अध्ययनका आधारमा यसपटकको प्रतिस्पर्धाको तयारी गरिरहेका छन् उनी ।
‘नेपाली खानालाई फेरी पनि विश्वमाझ चिनाउने अवसर प्राप्त गरेको छु, सबैको माया र आशिर्वादले यसपटक सफलता मिल्ने आशा गरेको छु,’ सन्तोषले भनेका छन् । क्रिसमसको अवसरमा प्रसारण गरिने उक्त रियालिटी सो क्रिसमस विकमा हुने बताइएको छ ।
