काठमाडौं- भारतको नयाँदिल्लीमा आफ्नो उपचार क्रममा भएको खर्च राष्ट्रपति रामचन्द्र पौडेल स्वयंले बेहोर्ने भएका छन्।

राष्ट्रपतिका प्रेस संयोजक खिला कार्कीले प्रेस नोटमार्फत उक्त जानकारी दिएका हुन्।

‘उपचारका क्रममा भएको खर्च राष्ट्रपति स्वयंले बेहोर्न चाहेको जानकारीका लागि अवगत गराइन्छ,’ प्रेस नोटमा भनिएको छ।

स्वास्थ्यमा समस्या आएपछि उनी शुरुमा त्रिवि शिक्षण अस्पतालमा भर्ना भएका थिए। त्यहाँबाट स्वास्थ्यमा सुधार नआएपछि उनलाई नयाँदिल्लीस्थित अखिल भारतीय आयुर्विज्ञान संस्थान (एम्स)मा एयर एम्बुलेन्समार्फत लगिएको थियो।

राष्ट्रपति पौडेल उपचारपछि आइतबार राति स्वदेश फिरेका थिए।