अर्घाखाँची – चर्चित लोक दोहोरी गायक बद्री पंगेनीले अर्घाखाँची महोत्सवमा दर्शकदेखि बुढी आमालाई रुवाएका छन् ।
गायक पंगेनीले विषेश गरी युवायुवतीलाई समेटेर गाएको गीत ‘बिदा पाउँदिन’, ‘अहिलेको सालमा आमा घर आउन पाउँदिन’ गीत गाउँदा स्थानीय आमाहरुले गह भरि आँसु झारे र रोए ।
कसैका छोराछोरी बाबुआमासँग बिछोड हुन नपरोस् भनेर आँसु खसालेका आमाहरुलाई सम्झाउदै सधै भरी नेताहरुले भाषण धेरै काम थोरै गर्ने गरेको पनि बताए । ‘नेपाली युवाले पेट पाल्न विदेशी भूमिमा रगत र पसिना बगाउन नपरोस’ भन्दै गायक पंगेनीले आफ्नो मनको भाव पोखे ।
अर्घाखाँचीको मुख्य सडक गोरुसिङ्गे सन्धिखर्क सडक यात्रा गर्दा निकै जोखिम भएकाले अझै पनि जनताले भनेको भएको छैन् भन्दै गित गाउँदै पंगेनीले अर्घाखाँचीबाट प्रतिनिधि सभा सदस्यमा निर्वार्चित टोपबहादुर रायमाझीलाई सडक सुधारमा लाग्न आग्रह समेत गरे ।
बुधबार दर्शकको माग बमोजिमका पानी सलल, चप्पल छिनियो, ससुरालीमा, पन्चेबाजा लगायतका गीत गाएर दर्शकलाई करिब २ घण्टा मनोरन्जन दिएका पंगेनीको साथमा दर्शक छमछमी नाचे ।
थुप्रै सांगीतिक क्रान्ति गरेका पंगेनी पि एन क्याम्पस¸ ब्युटी नमबर वान¸ फोटो फिर्ता लेउ¸ मेरो माया लाग्छ लाग्दैन¸ जिम्माल बाउको छोरीले ज्यान खायो¸ लाउ चेली सिन्दुर लाउ¸ अझै नि लोकतन्त्र आको छैन है, हात हेरैंदालगायतका गीतका सर्जक समेत हुन् पंगेनी ।
अर्घाखाँची उद्योग वाणिज्य संघ र अर्घाखाँची चेम्बर अफ कमर्सको संयुक्त आयोजनामा ‘कृषि, पर्यटन, उद्योग र व्यपार समृद्ध र सुखी अर्घाखाँची निर्माणको आधार’ भन्ने नाराका साथ माघ ११ देखि सुरु भएको अर्घाखाँची पाँचै महोत्सव २४ गतेसम्म हुनेछ ।