काठमाडौँ । पश्चिम नवलपरासी १ को मत गणना भइरहेको बर्दघाट नगरपालिका नजिकै मङ्गलबार राति एक युवकको खुकुरी प्रहार गरी हत्या भएको छ । घटनामा एक महिला घाइते भएकी छन् ।

मृतक, घाइते र खुकुरी हान्नेको पहिचान खुलेको छैन । इलाका प्रहरी कार्यालय बर्दघाट प्रहरीका अनुसार खुकुरी प्रहार गरिएका करिब ४५–४६ वर्षका ती युवकको घटनास्थलमै मृत्यु भएको हो । घाइते महिलालाई गम्भीर अवस्थामा उपचारका लागि अस्पताल पठाइएको छ ।

इलाका प्रहरी कार्यलय बर्दघाटले घटनाको अनुसन्धान गरिरहेको जनाएको छ । घटना घटेको स्थानमा गैडाकोट लेखेका केही कार्ड भेटिए पनि अरू केही खुलेको छैन । मत गणनास्थलबाट करिब सय मिटरको दुरीमा घटना भएको हो ।