कैलाली । धनगढीस्थित सेती प्रादेशिक अस्पतालले बिरामीको अत्यधिक चापलाई मध्यनजर गर्दै असोज १ गतेदेखि आफ्नो सेवा विस्तार गर्ने भएको छ। हाल शनिबार र आइतबार बन्द हुँदै आएको अस्पतालको सेवा अब आइतबारसमेत सञ्चालनमा आउने भएको हो।
अस्पतालले जारी गरेको सूचनाअनुसार असोज १ गतेदेखि आइतबार तथा अन्य सार्वजनिक बिदाका दिन बिहान १० बजेदेखि, सोमबारदेखि शुक्रबारसम्म बेलुकी ५ बजेपछि विस्तारित सेवा सञ्चालन हुनेछ भने शनिबार सेवा बन्द रहनेछ।
अस्पतालका मेडिकल सुपरिटेन्डेन्ट डा. हेमराज पाण्डेयका अनुसार पछिल्लो समय अस्पतालमा बिरामीको चाप अत्यधिक बढेपछि आइतबारसमेत सेवा सञ्चालन गर्ने निर्णय गरिएको हो।
“बिरामीको अत्यधिक चाप छ। उपचारका लागि आउने बिरामी फर्केर जानुपर्ने अवस्था नहोस् भनेर उपलब्ध जनशक्ति र स्रोतसाधनको अधिकतम उपयोग गर्दै सेवा दिइरहेका छौँ,” मेसु पाण्डेयले भने।
उनका अनुसार बिरामीको चाप यति बढेको छ कि अस्पतालमा एउटै बेडमा तीन जनासम्म बिरामी राखेर उपचार गर्नुपर्ने अवस्था सिर्जना भएको छ।
प्रदेश सरकार मातहतको सेती प्रादेशिक अस्पतालमा विकास समितिसहित ५० शय्या सरकारी र ७५ शय्या अस्पताल विकास समिति गरी १२५ शय्याको स्वीकृत क्षमता रहे पनि अहिले बिरामीको चापका कारण ३२० बेड सञ्चालनमा ल्याएर सेवा दिइरहेको डा. पाण्डेयले बताए।
“स्वीकृत बेड संख्या सीमित भए पनि बिरामीको चापअनुसार अहिले ३२० बेडसम्म सञ्चालन गरेर उपचार गरिरहेका छौँ,” उनले भने, “जनशक्ति भने सोहीअनुसार थपिएको छैन। न्यून जनशक्तिबाट धेरै बिरामीको उपचार गर्नुपर्ने अवस्था छ।”
अस्पतालमा बिरामीको संख्या निरन्तर बढ्दै गएपछि उपचार सेवा प्रभावित नहोस् भन्ने उद्देश्यले नियमित सेवाको समय विस्तार गरिएको अस्पताल प्रशासनले जनाएको छ।
