सुनसरी- जिल्लाको बराहक्षेत्र-१ झण्डा चोकमा सार्वजनिक शौचालय नहुँदा यात्रुहरूले सास्ती खेपिरहेका छन्।
दैनिक सयौं सवारी साधन आवतजावत हुने उक्त स्थानमा सार्वजनिक शौचालय नहुँदा यात्रु र ड्युटीमा तैनाथ प्रहरीलाई शौच गर्न समस्या भएको छ।
एक महिला प्रहरी भन्छिन्, ‘ड्युटीको समयमा दिसा–पिसाब लागेमा अर्काको निजी घर तथा होटलमा जान बाध्य छौं। होटल र घरमा शौचालय प्रयोग गर्न नदिएमा झाडी र खुला ठाउँमा जानुको विकल्प छैन। यो स्थानमा सार्वजनिक शौचालय बनाउन अति आवश्यक छ।’
मदन भण्डारी सडक खण्डअन्तर्गत चतरा-धरान, कान्छी चोक हुँदै पूर्व-पश्चिम जाने चौबाटो हो, झण्डा चोक। त्यहीं सार्वजनिक शौचालय नहुँदा बाहिरबाट आउने जाने यात्रुले झाडी र खुला ठाउँमा दिसा–पिसाब गर्न बाध्य भएको स्थानीय सन्तोष श्रेष्ठले बताए।
झण्डा चोकदेखि धरान पुग्न करिब १२ र कान्छी चोक करिब १७ किलोमिटर टाढा छन्। पूर्व–पश्चिम हिँडेका सवारी साधनका चालक, सहचालक र यात्रुलाई सार्वजनिक शौचालय नहुँदा निकै कष्ट खेप्नु परिरहेको छ।
यात्रु ओराल्ने–चढाउने र सर्वसाधारणको भीडभाड हुने उक्त ठाउँमा सार्वजनिक शौचालय नहुँदा लाज मान्दै झाडी र खुला क्षेत्रमा दिसा–पिसाब गर्न बाध्य भएको स्थानीय यातायात व्यवसायी राजेन्द्र श्रेष्ठको गुनासो छ।
सार्वजनिक शौचालय निर्माणका लागि पटक-पटक कुरा उठे पनि सरोकारवाला निकायले ध्यान नदिई बेवास्ता गरेको आरोप स्थानीय बासिन्दाको छ।
वडा अध्यक्षदेखि नगर प्रमुख रमेश कार्कीसम्मलाई शौचालयको बिषयमा धैरैपल्ट ध्यानाकर्षण गराउँदा समेत बेवास्ता गरेको उनीहरू बताउँछन्।
वडा नम्बर–१ का वडाध्यक्ष किसन थापाले भने शौचालय बनाउन आवश्यक सामग्रीहरू रिङ र पेन वडा कार्यालय उपलब्ध भए पनि जग्गाको समस्याले बनाउन नसकिएको बताए। र, त्यसको समाधान घुम्ती शौचालय भएको बताए। नगरमा रहेको घुम्ति शौचालय झण्डा चोकमा ल्याउन नगर प्रमुख कार्कीसँग आफूले पहल गरिरहेको थापाले जानकारी दिए।
भीमप्रसाद आचार्य संस्कृति, पर्यटन तथा नागरिक उड्डयन मन्त्री छँदा १७ चैत ०७० मा तत्कालीन बराहक्षेत्र गाविसलाई खुला दिसा-पिसाबमुक्त क्षेत्र घोषणा गरेका थिए। त्यसो त, सुनसरी जिल्ला नै १९ असार ०७५ मा खुला दिसामुक्त घोषणा भएको हो। तर, त्यो कागजमै सीमित बन्न पुगेको एक उदाहरण हो, झण्डा चोकको दुर्दशा।
बराहक्षेत्र–१ र २ मा बराहक्षेत्र मन्दिरमा एउटा, सप्तकोशी पुलमा एउटा, कुम्भ स्तम्भ अगाडि र पछाडि दुईवटा, चतरा बसपार्कमा एउटा, गौरी टोलमा एउटा तथा हाट खोला एउटा गरी ७ वटा सार्वजनिक शौचालयहरू छन्।