रुस–युक्रेन युद्धपछि पूर्वी एसियाली मुलुक जापानमा आणविक हतियारको सान्दर्भिकतामा चर्चा शुरु भएको छ। यस सम्बन्धमा जापानको सत्तारुढ लिबरल डेमोक्रेटिक पार्टी (एलडीपी)ले छलफल शुरु गरेको छ।
एलडीपीले जापानले आणविक हतियार विकास गरेर तैनाथ गर्नुपर्ने सम्भावनामा बहस चलाउने निर्णय गरेको छ। दोस्रो युद्धमा परमाणु आक्रमण झेलिसकेको जापानले दशकौंसम्म आणविक हतियार नबनाउने नीति अंगिकार ग¥यो।
रुसी राष्ट्रपति भ्लादिमिर पुटिनले युक्रेन युद्धमा अन्य देशको प्रवेश रोक्नको लागि रुसी परमाणु प्रणालीलाई हाई–अलर्टमा राखेको घोषणा गरेका छन्। रुस र जापान समुद्रमार्फत जोडिएका छन्। साथमा जापानलाई चीनको उदयले पनि चिन्तित बनाउने गर्छ। चीनले पछिल्लो समय तीव्रताका साथ आणविक हतियार विस्तार गरिरहेको छ।
चीनका अतिरिक्त जापानको अर्को छिमेकी मुलुक उत्तर कोरियाले पनि आणविक क्षमता विकास गरिरहेको छ। बुधबार सत्तारुढ एलडीपीको राष्ट्रिय सुरक्षा हेर्ने सदस्यहरूले यिनै मुद्दामा छलफल गर्न बैठक बोलाएका थिए।
एलडीपीको जनरल काउन्सिलका अध्यक्ष तत्सुओ फुकादाले देश र देशबासीको सुरक्षाको लागि जुनसुकै विषयमा वहसमा रोक लगाउन नहुने टिप्पणी गरेका छन्।
यसअघि जापानले तीन आणविक हतियारविरोधी सिद्धान्त अंगिकार गरेको थियो। पहिलोपटक सन् १९६७ मा लागू भएको सो सिद्धान्तअन्तर्गत् जापानभित्र आणविक हतियार बनाउन र भण्डार गर्न प्रतिबन्ध छ।
जापानी नागरिकहरू विगतको कटु अनुभवका कारण आणविक हतियारप्रति नकारात्मक देखिन्छन्। तथापि, पूर्वप्रधानमन्त्री सिन्जो आबेले आवश्यक पर्दा नेटोसँग आणविक हतियार सेयर गर्न सक्ने विकल्पमा बहस चलाएका थिए। आबेले यो विकल्पबारे धेरै जापानीहरू अनविज्ञ रहेको बताएका थिए।