काठमाडौँबाट प्रहरीले ठूलो परिमाणमा लागु औषध (खैरो हेरोइन)सहित ११ जनालाई पक्राउ गरेको छ । पक्राउ पर्नेमा सशस्त्र प्रहरी बलका हवल्दारसमेत रहेका छन् ।
काठमाडौँ उपत्यकाका विभिन्न ठाउँबाट ३२२ दशमलव ६ ग्राम खैरो हेरोइनसहित उनीहरूलाई पक्राउ गरेको प्रहरीले जनाएको छ । पक्राउ पर्नेमा झापाको दमक घर भएका वर्ष २८ का सुनिल ताजपुरिया, भारत घर भएका श्यामल सिंह रहेका छन् ।
यस्तै, मोरङ घर भएका ३९ वर्षीय खगेन्द्र भुजेल छन् । मोरङका दुलारी घर भएका भुजेल सशस्त्र प्रहरीका हवल्दार हुन् । सशस्त्र प्रहरी बल गण नम्बर–२ झापामा कार्यरत भुजेल पनि लागु औषध कारोबारमा संलग्न देखिएको ब्यूरोले जनाएको छ ।
थप पक्राउ पर्नेमा म्याग्दी घर भएका लालबहादुर बुढाथोकी, दोलखा घर भएका कौशल बस्नेत, सिन्धुपाल्चोक घर भएका समिर घले गुरुङ, झापाका अन्जान राई र उनका सहयोगी झापाका संजय लक्सम्बा लिम्बु, झापा घर भएका २९ वर्षीय अजय तामाङ उर्फ कर्मा, झापाकै २८ वर्षीय पुकार गुरुङ, ३० वर्षीय प्रविन भण्डारीलाई प्रहरीले पक्राउ गरेको छ ।
बयानका आधारमा पुकार र प्रविनलाई झापाको बिर्तामोडबाट पक्राउ गरिएको ब्युरोले जनाएको छ ।