युक्रेनमा अस्पतालमा बम प्रहार गरेर रुसी राष्ट्रपति भ्लादिमिर पुटिनले युद्ध अपराध गरेको स्पेन र स्लोभेनियाका प्रधानमन्त्रीहरूले बताएका छन्।
आफ्ना अलग-अलग वक्तव्यमा दुवै प्रधानमन्त्रीले रुसी राष्ट्रपति पुटिनले युद्ध अपराध गरेको बताएका हुन्।
‘हामीले कसरी अस्पतालमाथि निरन्तर बम आक्रमण भयो भन्ने देखेका छौँ। निर्दयी ढंगबाट निहत्था सर्वसाधारणलाई निशाना बनाइएको छ,’ स्पेनका प्रधानमन्त्री पेड्रो सान्चेजले भने, ‘यो मानव अधिकारको ठाडो उल्लंघन हो। र, मस्कोले युद्ध अपराध गरेको छ।’ स्पेनस्थित युक्रेनी शरणार्थी केन्द्रको निरीक्षणका क्रममा उनले पुटिनले युक्रेनमा युद्ध अपराध गरिरहेको बताएका हुन्।
उनको भनाइलगत्तै स्लोभिनियाका प्रधानमन्त्री जानेज जेन्साले पनि युक्रेनको मारियुपोलस्थित अस्पतालमा बम बर्साएर पुटिनले युद्ध अपराध गरेको बताएका छन्। ‘हामी सबैले देख्न सक्छौँ, सबै महासन्धिहरू उल्लंघन गर्दै पुटिनले युद्ध अपराध गरेका छन्,’ उनले भने। युरोपियन पिपल्स पार्टीको बैठकमा सहभागी हुन फ्रान्सको राजधानी पेरिस पुगेका उनले पुटिनमाथि युद्ध अपराधको आरोप लगाएका हुन्।