काठमाडौं- काठमाडौं महानगरपालिकामा परीक्षण गरेकामध्ये ६० प्रतिशत बिरामीमा कोरोना भाइरस संक्रमण देखिने गरेको छ। अहिले महामारी तीव्र रूपमा फैलिएकाले परीक्षण गर्न आउने बढेका र आएकामध्ये ५५ देखि ६० प्रतिशतमा संक्रमण देखिन थालेको महानगरपालिकाले जनाएको छ।

कारोना बढेकाले नै महानगरले अहिले ३२ वटै वडाबाट परीक्षण गरिरहेको छ। अहिले परीक्षण दर पनि बढेको छ। महानगरमा मात्रै दैनिक झण्डै एक हजारजना परीक्षण गर्न आउँछन्। संक्रमण बढे पनि विगतजस्तो जटिल किसिमका बिरामीहरू नआएको र आए पनि उपचारका लागि तयारी अवस्थामा रहेको महानगरका प्रवक्ता ईश्वरमान डंगोलले बताए। उनका अनुसार कोरोना महामारीको पहिलो र दोस्रो चरणमा प्रयोग भएका निःशुल्क सञ्चालन गरिएका आइसोलेसन र क्वारेन्टिन स्थलहरू यसपटक पनि आवश्यक परेको खण्डमा तयारी अवस्थामा राखिएको छ।

‘हामीले त्यसका लागि गृहमन्त्री, विभिन्न अस्पताल र नेपाली सेनासँग छलफल गरेका छौँ। नेपाली सेना र अस्पतालहरूलाई तयारी अवस्थामा रहन भनेका छौँ,’ उनले भने, ‘हामी पनि तयारी अवस्थामा छौँ। आवश्यक प¥यो भने तुरुन्तै निःशुल्क आइसोलेसन र क्वारेन्टिनहरू सञ्चालन गर्नेछौँ।’