काठमाडौं- आज २८ सेप्टेम्बर। विश्व इतिहासका धेरै घटनाले आजको दिन स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् २००८- फाल्कन-१ प्रक्षेपण
अमेरिकी अन्तरिक्ष यान निर्माता स्पेस-एक्सले निर्माण गरेको फाल्कन-१ आजकै दिन प्रक्षेपण गरिएको थियो। एलन मस्कको यो कम्पनीले अन्तरिक्ष यान निर्माणमा आफूलाई अग्रणी रूपमा स्थापित गरेको छ। चौथो प्रयासमा उक्त अन्तरिक्ष यान प्रक्षेपणमा सफलता मिलेको थियो।
– सन् १९९५- इजरायल र पीएलओबीच ओस्लो-२ सम्झौता
वेस्ट बैंक र गाजापट्टीसम्बन्धी दोस्रो ओस्लो सम्झौतामा आजकै दिन हस्ताक्षर भएको थियो। यस सम्झौतामार्फत गाजा र वेस्ट बैंकलाई तीन क्षेत्रमा विभाजित गरिएको थियो। तीमध्ये केही क्षेत्रमाथि प्यालेस्टिनीहरूलाई सीमित नियन्त्रण दिइएको थियो। उक्त सम्झौतामा इजरायली प्रधानमन्त्री यिज्याक रविन र प्यालेस्टाइन मुक्ति संगठन (पीएलओ)का अध्यक्ष यासेर अराफातले हस्ताक्षर गरेका थिए। त्यससँगै प्यालेस्टिनमा निर्वाचनका लागि आह्वान गरिएको थियो।
– सन् १९८०- कार्ल सेगनको कसमस
खगोलशास्त्री कार्ल सेगनको विख्यात टेलिभिजन शृंखला ‘कसमसः अ पर्सनल भोएज’ आजकै दिनदेखि प्रसारण आरम्भ भएको थियो। यो शृंखला १३ एपिसोडको थियो। यो शृंखलाको प्रस्तोता सेगन आफैं थिए भने लेखकहरू सेगन, एन ड्रुयन र स्टेभन सोटर थिए। यो संसारभर सबैभन्दा बढी हेरिएको विज्ञान-आधारित टीभी वृत्तचित्रमध्ये एक हो।
– सन् १९६१- युनाइटेड अरब रिपब्लिकको विघटन
हालको सिरियाको राजधानी दमास्कसमा भएको सैन्य ‘कु’का कारण संयुक्त अरब रिपब्लिकको विघटन भएको थियो। यो सिरिया र इजिप्टबीचको एक अल्पकालिक संघ थियो।
– सन् १९२४- संसारभर पहिलो उडान
६ अप्रिल १९२४ मा अमेरिकी सेनाको एयर सर्भिसका पाइलटहरूको चारवटा टिम संसारको फेरो मार्न सियाटल र वासिङ्टनबाट निस्किएका थिए। चारवटा डगलस वर्ल्ड क्रुजर जहाजहरूको नाम सियाटल, सिकागो, बोस्टन र न्यू ओर्लिएन्स राखिएको थियो। १७५ दिनपछि सिकागो र न्यू ओर्लिएन्स सियाटल फर्किए। बोस्टन र सियाटलले संसारभर २७ हजार ५०० माइलको यात्रा पूरा गर्न सकेनन्।
– सन् १९४७- शेख हसिना वाजेदको जन्म
बंगलादेशकी प्रधानमन्त्री शेख हसिना वाजेदको जन्म आजकै दिन भएको हो। उनी बंगालदेशकी सबैभन्दा लामो समय प्रधानमन्त्री रहने नेतृ हुन्।
– सन् १९०७- भगत सिंहको जन्म
भारतका शहीद भगत सिंह आजकै दिन जन्मेका थिए। ब्रिटिस शासनविरुद्धको आन्दोलनमा तत्कालीन इस्ट इन्डिया कम्पनीका सैनिकले २३ मार्च १९३१ मा उनको हत्या गरेका थिए।
– सन् २०००- क्यानाडाका प्रधानमन्त्री पियरे ट्रुडोको निधन
क्यानाडाका हालका प्रधानमन्त्री जस्टिन ट्रुडोका पिता पियरे ट्रुडोको आजकै दिन निधन भएको थियो। उनी क्यानाडाका १५औं प्रधानमन्त्री थिए। उनको खास नाम जोसेफ फिलिप्पे पियरे वाइभेस एलियट ट्रुडो थियो।